ԵՐԵՎԱՆ, 2 ՆՈՅԵՄԲԵՐԻ, ԱՐՄԵՆՊՐԵՍ: ՀՀ վարչապետ Կարեն Կարապետյանն ասուլիս է հրավիրել ամփոփելու մեկամյա գործունեության արդյունքները:

«Արմենպրես»-ը ներկայացնում է հեռարձակումն ըստ «1in.am»-ի ռադիոկայանի:

ՀՀ վարչապետ Կարեն Կարապետյանը հրավիրված մամուլի ասուլիսում ներկայացրեց ընթացիկ տարվա հիմնական մակրոտնտեսական ցուցանիշների աճը և 2018 թվականին նախատեսված բյուջեի եկամուտները, դեֆիցիտը և ծախսերը: «Արմենպրես»-ի փոխանցմամբ, վարչապետը նշեց, որ 2017 թվականի համեմատ 2018 թվականին կանխատեսել են եկամուտների 8 տոկոս աճ, դեֆիցիտը 3,8 տոկոս, ծախսերը՝ 7,7 տոկոս:

Տնտեսության ակտիվության ցուցանիշն այս տարվա առաջին 9 ամիսների ընթացքում արձանագրել է 5.1 տոկոս աճ: «Արդյունաբերական արտադրանքի աճը կազմել է 11.9 տոկոս, առևտրի շրջանառության ոլորտում արձանագրվել է 12.5 տոկոս աճ, Էլեկտրաէներգիայի արտադրության բնագավառում` 6.5 տոկոս աճ: Միջին ամսական անվանական աշխատավարձն ավելացել է 2.4 տոկոսով, արտաքին առևտրաշրջանառությունը` 21.7 տոկոսով», - ասաց վարչապետը՝ ավելացնելով, որ գյուղատնտեսության համախառն արտադրանքի ծավալը նվազել է 9.9 տոկոսով, շինարարության ծավալը նվազել է 6.4 տոկոսով:

Կարեն Կարապետյանն ընդգծեց, որ արտահանման ոլորտում գրանցվել է 19.1 տոկոս աճի ցուցանիշ, իսկ ներմուծման ոլորտում` 23.2 տոկոս աճ:

Վարչապետը նշեց, որ 2017 թվականի տասն ամիսներին ավելացված արժեքի հարկի մասով վերադարձված գումարը կազմել է 49 միլիարդ 700 միլիոն դրամ։ «Կարևոր է նշել, որ մինչև 20 միլիոն դրամի հայտերի հիման վրա ԱԱՀ-ի գումարների վերադարձը կատարվում է ընդամենը 4 աշխատանքային օրվա ընթացքում՝ նախկինում 90 օրվա փոխարեն»,-ասաց վարչապետ Կարապետյանը։ Նա նշեց, որ հարկային ստուգումները կրճատվել են 48 տոկոսով։

***

ՀՀ վարչապետ Կարեն Կարապետյանը հրավիրված մամուլի ասուլիսում ներկայացրեց ընթացիկ տարվա հիմնական մակրոտնտեսական ցուցանիշների աճը և 2018 թվականին նախատեսված բյուջեի եկամուտները, դեֆիցիտը և ծախսերը: «Արմենպրես»-ի փոխանցմամբ, վարչապետը նշեց, որ 2017 թվականի համեմատ 2018 թվականին կանխատեսել են եկամուտների 8 տոկոս աճ, դեֆիցիտը 3,8 տոկոս, ծախսերը՝ 7,7 տոկոս:

Տնտեսության ակտիվության ցուցանիշն այս տարվա առաջին 9 ամիսների ընթացքում արձանագրել է 5.1 տոկոս աճ: «Արդյունաբերական արտադրանքի աճը կազմել է 11.9 տոկոս, առևտրի շրջանառության ոլորտում արձանագրվել է 12.5 տոկոս աճ, Էլեկտրաէներգիայի արտադրության բնագավառում` 6.5 տոկոս աճ: Միջին ամսական անվանական աշխատավարձն ավելացել է 2.4 տոկոսով, արտաքին առևտրաշրջանառությունը` 21.7 տոկոսով», - ասաց վարչապետը՝ ավելացնելով, որ գյուղատնտեսության համախառն արտադրանքի ծավալը նվազել է 9.9 տոկոսով, շինարարության ծավալը նվազել է 6.4 տոկոսով:

Կարեն Կարապետյանն ընդգծեց, որ արտահանման ոլորտում գրանցվել է 19.1 տոկոս աճի ցուցանիշ, իսկ ներմուծման ոլորտում` 23.2 տոկոս աճ:

Վարչապետը նշեց, որ 2017 թվականի տասն ամիսներին ավելացված արժեքի հարկի մասով վերադարձված գումարը կազմել է 49 միլիարդ 700 միլիոն դրամ։ «Կարևոր է նշել, որ մինչև 20 միլիոն դրամի հայտերի հիման վրա ԱԱՀ-ի գումարների վերադարձը կատարվում է ընդամենը 4 աշխատանքային օրվա ընթացքում՝ նախկինում 90 օրվա փոխարեն»,-ասաց վարչապետ Կարապետյանը։ Նա նշեց, որ հարկային ստուգումները կրճատվել են 48 տոկոսով։

***

Հայաստանի Հանրապետության վարչապետ Կարեն Կարապետյանն ապարդյուն է համարում խոսակցություններն այն մասին, թե իր և ՀՀ Նախագահ Սերժ Սարգսյանի միջև պայմանավորվածություն է ձեռք բերվել 2018 թվականին իր փոխվարչապետ դառնալու շուրջ: Ինչպես հաղորդում է «Արմենպրես»-ը, այս մասին Կարապետյանը հայտարարեց կառավարությունում լրագրողների հետ հանդիպման ժամանակ:

«Ես այս հարցին բազմիցս պատասխանել եմ: Այս պահի դրությամբ ապրիլի 9-ից հետո Հայաստանի հանրապետական կուսակցությունը կոալիցիոն գործընկերոջ հետ համատեղ առաջարկելու է վարչապետի իր թեկնածությունը: Նման քննարկումներ մենք չենք ունեցել, ուստի որևէ պայմանավորվածության մասին խոսելն ապարդյուն է»,- հայտարարեց վարչապետը:

Պատասխանելով հարցին, թե արդյոք ցանկանում է մնալ ՀՀ վարչապետի պաշտոնում՝ Կարապետյանն ասաց. «Ես հստակ հայտարարել եմ, որ պատրաստ եմ: Շարունակում եմ աշխատանքները հնարավորություններիս ներածին չափով: Ես ցանկանում եմ ծառայել մեր երկրին: Վստահ եմ, որ մենք հաստատ կարող ենք լավ երկիր ունենալ՝ տրամաբանական, զարգացող»:  Նա ընդգծեց, որ ՀՀԿ հետագա անելիքները հստակ ձևակերպված են: «Մենք նոր սահմանադրություն ենք ընդունել, նոր կարգավիճակի ենք անցնում, որտեղ հստակ ձևակերպված է, թե ինչպես դա կլինի»,- նշեց նա:

Անդրադառնալով հարցին, թե արդյոք համակարծիք է մի խումբ հանրապետական գործիչների այն պնդմանը, թե Սերժ Սարգսյանն անփոխարինելի է որպես ՀՀԿ նախագահ և Հայաստանի անվտանգության երաշխավոր՝ վարչապետն ասաց. «Ինչ վերաբերում է Սերժ Սարգսյանի վարկանիշին՝ որպես անվտանգության երաշխավոր, որպես մեծ փորձ ունեցող ղեկավար, պետք է ասեմ, որ ես այդ պնդումների հետ լիարժեք համաձայն եմ»:

***

«Հայաստանի ներդրողների ակումբ»-ն առաջիկա 10-12 օրերի ընթացքում հստակ կհայտարարի ներդրումների մասին: Այդ մասին հրավիրված ասուլիսում հայտարարեց  վարչապետ Կարեն Կարապետյանը: «Ներդրողների ակումբը երբ ստեղծեցինք՝ բոլորը երկրորդ օրը հարցնում էին, թե ուր են ներդրողները: Իրենք մոտ ժամանակներս հստակ կհայտարարեն ներդրումների մասին, առաջիկա 10-12 օրվա ընթացքում»,- «Արմենպրես»-ի փոխանցմամբ,  ասաց վարչապետը:   

Միաժամանակ, կառավարության ղեկավարն ասաց, որ Հայաստանի տնտեսական վիճակը գնահատում է կառավարելի և հեռանկարային: «Չեմ ասում, որ բոլոր խնդիրները լուծել ենք: Այսօր օտարերկրյա ներդրողին բերելու համար նախևառաջ պետք է ստեղծենք միջավայր և այդ առումով կարևոր է սեփական՝ ներքին ներդրողին ակտիվացնելը: Կարծում եմ, որ այս տարի մենք որոշակիորեն ֆոնը փոխել ենք»,- ասաց Կարեն Կարապետյանը:

Ինչ վերբերում է գնաճին՝ վարչապետն ասաց, որ այս տարվա կտրվածքով կանխատեսվում է 0,6-0,8 տոկոս գնաճ: Այդ առումով, Կարեն Կարապետյանն ասաց, որ համաձայն չէ, թե այս տարի քաղաքացու սոցիալական վիճակը վատացել է:

Նոյեմբերի 1-ին ռուսական ԶԼՄ-ներին տված հարցազրույցում ՀՀ Նախագահ Սերժ Սարգսյանը հայտարարել էր, որ «Հայաստանի ներդրողների ակումբ»-ը նոյեմբերի 13-ին Երևանում կազմակերպելու է մեծ շնորհանդես՝ ներդրումային ծրագիր սկսելու մասին (մեկ միլիարդ դոլարից մի փոքր ավելի): 

***

Հայաստանի պետական ապարատը շատ ավելի մեծ է, քան պետք է: Ինչպես հաղորդում է «Արմենպրես»-ը, այս մասին ՀՀ վարչապետ Կարեն Կարապետյանը հայտարարեց կառավարությունում լրագրողների հետ հանդիպման ժամանակ՝ անդրադառնալով պետական համակարգում կրճատումների փաստին:

«Բոլորդ մեզանից պահանջում եք արդյունավետ աշխատանք: Պահանջում եք, որ աշխատողն իր տեղում իր գործառույթը կատարի: 5500 մարդու կրճատելով՝ լավագույններին չենք կրճատում»,- հայտարարեց վարչապետը:

Նա ընդգծեց, որ կրճատվող աշխատակիցների շարքում են լինելու նաև թույլ պաշտոնյաները: «Հարցնում եք՝ ուսուցչին ինչպե՞ս եք կրճատում: Քի՞չ օրինակներ գիտեք, երբ ուսուցիչը ուսուցիչ չէ, և ավելի լավ է ուսուցիչ չլինի: Կամ երբ բժիշկը բժիշկ չէ ու լավ է չլինի: Պետք է ավելի ռացիոնալ լինել: Պետական ապարատն ավելի մեծ է, քան պետք է: Շատ կտրուկ չենք կարողանում կրճատել, քանի որ խնդրահարույց է համապատասխան որակավորում ունեցող մարդ ընդունելը»,- ասաց Կարապետյանը:

Նա շեշտեց, որ լավ երկիր ունենալ հնարավոր չէ, եթե չկա լավ կառավարում: «Դա դոգմա է, չի կարելի մոտավորապես կառավարելով լավ արդյունք ստանալ: Պետությունն իրականում մեծ գործառույթներ ունի իրականացնելու: Ես կողմնակից եմ, որ բիզնեսում պետության հիմնական գործառույթը բիզնեսին չխանգարելը լինի: Բայց այսօրվա իրավիճակն այնպիսինն  է, որ մենք շատ դեպքերում բիզնեսի համար կատալիզատորի դեր են կատարում և օժանդակելու ենք դրան: Հենց բիզնեսը կայունանա, կանգնի ոտքի, այդ ժամանակ արդեն մեր գործառույթը կլինի նրանց չխանգարելը»,- հայտարարեց ՀՀ վարչապետը:

***

Հայ գործարարները Բաքու-Թբիլիսի-Կարս երկաթգծից կօգտվեն, եթե առաջարկը լինի ձեռնտու: Այդ մասին հրավիրված ասուլիսում հայտարարեց ՀՀ վարչապետ Կարեն Կարապետյանը՝ անդրադառնալով հարցին, թե արդյոք հայկական կողմը կկարողանա օգտվել այդ երկաթուղուց: «Բաքու-Թբիլիսի-Կարս երկաթգծից կօգտվենք, թե ոչ՝ կախված է առաջարկից: Եթե բիզնեսմենին լինի ձեռնտու առաջարկ, ապա կօգտվի, եթե ոչ՝ չի օգտվի»,- «Արմենպրես»-ի փոխանցմամբ,  ասաց Կարեն Կարապետյանը:  

Անդրադառնալով Իրան-Հայաստան երկաթգծի ծրագրին՝ վարչապետն ասաց, որ նախ պետք է հաշվարկել, թե այն կառուցելուց հետո մատուցվող ծառայությունն ինչ գին կարժենա և այն համեմատել ավտոճանապարհի ծախսի հետ: «Պետք է բիզնես տրամաբանություն, դա ինքնանպատակ չէ: Պետք է առաջիկայում ուսումնասիրել Իրանի հետ համագործակցության հոսքերը, դրանց ավելացումը՝ հաշվի առնելով հյուսիս-հարավ ավտոմայրուղու, Մեղրիի ազատ տնտեսական գոտու գործոնները:  Երբ այդ ինդիկատորները լինեն՝ մենք կքննարկենք»,- ասաց Կարեն Կարապետյանը: 

***

Հայաստանը մտադիր է մշտապես ունենալ ատոմային էներգետիկա: Հրավիրված ասուլիսում այդ մասին հայտարարեց ՀՀ վարչապետ Կարեն Կարապետյանը՝ անդրադառնալով նոր ատոմակայան կառուցելու մասին հարցին: Վարչապետը հիշեցրեց, որ գործող ատոմային էներգաբլոկի գործունեության ժամկետը երկարաձգվել է մինչև 2027 թվականը: «Մենք ունենք շատ մեծ ռեսուրս ու ներուժ, բայց այսօր վիճակն այնպիսին է, որ փող ունենալը դեռ չի նշանակում ունենալ ատոմային էներգետիկա», - «Արմենպրես»-ի փոխանցմամբ, ասաց Կարեն Կարապետյանը: Վարչապետի խոսքով, անվտանգության խնդիրը շատ կարևոր է և մեր երկիրը մտադիր է ատոմային էներգետիկա միշտ ունենալ:

***

ՀՀ կառավարությունը դիտարկում է անարդյունավետ շահագործվող գործարանների վերաբերյալ ներկայացվող առողջացման բոլոր ծրագրերը։ «Արմենպրես»-ի փոխանցմամբ՝  այս մասին լրագրողների հետ հանդիպմանը տեղեկացրեց վարչապետ Կարեն Կարապետյանը։ «Մենք չենք ասել, որ բոլոր գործարանները վերականգնելու ենք։ Իրականում այդ բոլոր գործարանների սեփականատերերը, եթե գալիս են մեզ ներկայացնում են առողջացման ծրագիր ու կառավարության կողմից որոշակի աջակցություն են ակնկալում, այդ թվում՝ համապատասխան վարկային միջոցներ, մենք նայում ենք։ Որ ասենք մեծ ալիք է բարձրացել, հաջող օրինակներ ունենք՝  դեռևս ոչ»,-ասաց Կարեն Կարապետյանը։

Այնուամենայնիվ՝ գործադիրի ղեկավարի կարծիքով՝ կամաց քայլերով հասնում են այն կետին, երբ կլինեն կիրառական արդյունքներ։ Նա նշեց, որ առաջարկել են բանկերին, որտեղ առկա են բազմաթիվ ակտիվներ, որոնք, սակայն, չեն աշխատում, միասին աշխատել։ «Ճիշտն ասած՝ բանկերի կողմից ավելի մեծ ակտիվություն էինք ակնկալում, որն այս պահին չենք նկատում։ Մենք ասել ենք այդ ակտիվը կորչելու է ձեզ մոտ, առաջարկում ենք դուք էլ շարժվեք, մենք էլ շարժվենք։ Մենք որոշակի միջոցներ տրամադրենք, որպես կառավարիչներ համատեղ մասնակցենք»,-մեխանիզմը պարզաբանեց Կարեն Կարապետյանը։

***

ՀՀ վարչապետ Կարեն Կարապետյանը 2018-ին 4.5 տոկոսանոց տնտեսական աճի կանխատեսումը համարում է տրամաբանական։ Նոյեմբերի 2-ին լրագրողների հետ հանդիպմանը Կարեն Կարապետյանը նկատեց, որ հաջորդ տարվա աճը լինելու է արդյունավետության, գոյություն ունեցող կապիտալի, մարդկային ռեսուրսների աճի, ինչպես նաև մասնավորի հաշվին։ «Այն, ինչ մտադիր ենք անել 2018-ին, հաջորդ տարիների համար աճի ապահովմանն է միտված։ Մենք պետք է ֆիքսենք, որ այն իրավիճակը, որ կար աշխարհում ու մեր երկրում, թույլ չի տվել նախկին կառավարիչներին հաջորդ աճերի համար ներուժի բազա ստեղծել։ Այդ իսկ պատճառով՝ մենք այսօր աճը ձևակերպում ենք սպառման պահանջարկի աճից ելնելով, քանի որ սպառողը շատ ավելի արագ է արձագանքում, քան ներդրողը»,- «Արմենպրես»-ի փոխանցմամբ՝ ասաց վարչապետը։

Նա հավելեց, որ եթե 2018-ին, բացի կապիտալ ծախսերի կատարումից, իրագործվեն նաև բիզնես միջավայրի փոփոխության, տեղական ներդրողների մոտ լավատեսությունը բարձրացնող քայլեր, ապա հնարավորին լավ բազա կստեղծվի 2019-ի համար։

***

Պետական կառավարման համակարգը նոր ու խելացի կադրերով համալրելու նպատակով փոփոխություններ են նախատեսվում «Քաղաքացիական ծառայության մասին» օրենքում։ «Արմենպրես»-ի հաղորդմամբ՝ մամուլի ասուլիսի ժամանակ հայտարարեց ՀՀ կառավարության ղեկավար Կարեն Կարապետյանը՝ պատասխանելով հարցին, թե արդյոք չեն պատրաստվում քայլեր ձեռնարկել նշյալ գործընթացն առավել ճկուն կազմակերպելու ուղղությամբ։ «Չափազանց սրտիցս եք խոսում։ Այո մենք պատրաստվում ենք փոփոխություն իրականացնել «Քաղաքացիական ծառայության մասին» օրենքում, քանի որ մենք իրականում լավ երիտասարդ ու ոչ միայն երիտասարդ կադրերի ներգրավման խնդիր ունենք»,-ասաց վարչապետը։

Կարեն Կարապետյանի խոսքով՝ նախատեղվող փոփոխություններն արդեն շրջանառվում են շահագրգիռ գերատեսչություններում։ 

Նոյեմբերի 2-ին վարչապետ Կարեն Կարապետյանը հայաստանյան ԶԼՄ-ներին հրավիրել էր մամուլի ասուլիսի, որը տևեց 1.5 ժամ։ Վարչապետը պատասխանեց լրատվամիջոցներին հետաքրքրող բոլոր հարցերին։ 

***

ՀՀ կառավարության ղեկավարը վստահ է, որ 2018-ին շինարարության ծավալների աճ է արձանագրվելու, իսկ առաջիկա տարիներին այդ ոլորտում ամենացածր ցուցանիշը լինելու է 2016 կամ 2017 թվականինը։ «Արմենպրես»-ի հաղորդմամբ՝ Կարեն Կարապետյանն այս մասին խոսեց լրագրողների հետ հանդիպմանը՝ արձագանքելով դիտարկմանը, որ գնալով շինարարության ծավալներն անկում են ապրում։

«Շինարարության մեջ 2017-ի սեպտեմբերին 2016-ի սեպտեմբերի նկատմամբ ունենք 3,3 տոկոս աճ։ Ճիշտն ասած՝ կանխատեսում ենք, որ այս տարվա ավարտին կունենանք նույն ցուցանիշները, ինչ 2016-ին, գուցե ավելին։ Բայց 2018-ին միանշանակ աճ ենք ունենալու։ Ազդակները, որ ստանում ենք՝ սպառման ու պահանջարկի աճը, նաև շինարարական թույլտվությունների տրամադրման վիճակագրական տվյալները, մեր կապիտալ ծախսերը, շինարարության մեջ կատարվելիք ներդրումները, մեզ հուշում են, որ 2018-ին կունենանք 2017-ի նկատմամբ աճ»,-ասաց Կարեն Կարապետյանը։

Նա անդրադարձավ նաև գյուղատնտեսության ոլորտին (2017 թվականի ինն ամիսներին գյուղատնտեսության համախառն արտադրանքի ծավալը կազմել է 90.1 տոկոս)՝ նշելով, որ 2018-ին կանխատեսել են 4 տոկոս աճ։ «Եթե բնակլիմայական արտառոց վիճակներ չլինեն, ես համարյա վստահ եմ, որ մեր գյուղատնտեսության աճը կլինի 4 տոկոսից ավելի»,-հավելեց գործադիրի ղեկավարը։

Կարեն Կարապետյանը հայտնեց, որ թե գյուղատնտեսության, թե շինարարության ոլորտներում, որտեղ ստվերը շատ է, թվային տվյալների հավաստման հետադարձ ինդիկատորների կարիք կա։

***

ՀՀ վարչապետ Կարեն Կարապետյանը լրագրողներից ակնկալում է առարկայական քննադատություն՝ առանց պիտակավորումների, առանց անձնական կյանքին խառնվելու և ընտանիքի անդամներին ներգրավելու։ «Արմենպրես»-ի փոխանցմամբ՝ այս մասին կառավարության ղեկավարը հայտարարեց նոյեմբերի 2-ին հրավիրված ասուլիսում։ «Շատ եմ ցանկանում, որ դուք մաքսիմալ ուշադիր լինեք մեր ծրագրերին ու մեզ առաջարկներ անեք, մենք իրականում քննադատությունից չենք վախենում։ Չափազանց շահագրգռված եմ, որ տնտեսական լրագրողները բարձրացնեն իրենց մասնագիտական մակարդակը։ Դա չի նշանակում, որ մենք պրոֆեսիոնալ ենք, դուք չէ։ Մենք էլ պետք է մեզ վրա աշխատենք, մարզպետները, բոլոր կառավարիչները։ Եթե մեկ օր դու քո վրա չես աշխատում, որոշ ժամանակ հետո դու արդեն ակտուալ չես»,-ասաց Կարեն Կարապետյանը։

Անդրադառնալով իր ղեկավարած կառավարության մեկամյա գործունեության ձախողումներին ու հաջողություններին, ինչպես նաև իր այն մտքին, որ աշխարհը շուռ է տալու, նա ասաց. «Հիմա էլ եմ հայտարարում՝ աշխարհը շուռ ենք տալու, ունենալու ենք լավ երկիր: Ունենք բազմաթիվ հաջողություններ, բազմաթիվ անհաջողություններ: Անհաջողություններն ավելի քիչ, քան հաջողությունները: Կներեք այսպիսի անհամեստ պատասխանի համար»։