ԵՐԵՎԱՆ, 9 ՆՈՅԵՄԲԵՐԻ, ԱՐՄԵՆՊՐԵՍ: «Մանկական Եվրատեսիլ»-ը  (Junior Eurovision Song Contest) ամենամյա հեռուստատեսային միջազգային երգի մրցույթ է, որի նպատակն է երիտասարդ տաղանդավոր արտիստների հայտնաբերումը: Այսօր երաժշտական ամենահայտնի այս մրցույթը գրավում է միլիոնավոր մարդկանց ուշադրությունը ոչ միայն փոքրերի, այլեւ մեծերի շրջանում: 2011թ-ի հունվարի 18-ին Եվրոպական հեռարձակողների միությունը որոշում ընդունեց առաջիկա մրցույթը անցկացնել Երեւանում: Սա «Մանկական Եվրատեսիլ»-ի պատմության մեջ առաջին անգամ է, երբ նախորդ մրցույթի հաղթող երկիրը դառնում է նաեւ հաջորդ տարվա հյուրընկալող երկիր: Դեկտեմբերի 3-ին Կարեն Դեմիրճյանի անվան մարզահամերգային համալիրում  կայանալիք «Մանկական Եվրատեսիլ- 2011»-ին մնացել են հաշված օրեր: Մրցույթի նախապատրաստական աշխատանքների բուռն ընթացքի եւ այլ մանրամասների մասին «Արմենպրես»-ի թղթակցին հաջողվեց տեղեկանալ «Մանկական Եվրատեսիլ- 2011»-ի պատվիրակությունների ղեկավար Գոհար Գասպարյանի հետ ունեցած բացառիկ հարցազրույցի ընթացքում:

-Ինչո՞վ կտարբերվի տարվա ամենասպասված երաժշտական իրադարձությունը նախորդներից: 

-Մենք ի սկզբանե փորձում ենք անել այնպես, որ ոչ թե տարբերվենք ինչ-որ մեկից, այլ հնարավորինս լավ եւ կազմակերպված ներկայանանք, բարձր մակարդակով: Բնականաբար կովկասյան տարածաշրջանի շունչը, հայկական մշակույթը կզգացվի բեմում, սակայն դրա համար առանձնակի ոչինչ չկա անելու: Մրցույթի սարեր պատկերող տարբերանշանը,  «Հասի՛ր բարձունքին» կարգախոսը հենց այնպես չեն ընտրված, այլ ասոցացվում են տարածաշրջանի հետ եւ արդեն տարբերություն են դնում նախորդ «Մանկական Եվրատեսիլ»-ների հետ: Կամա, թե ակամա տվյալ երկրի շունչը զգացվելու է, եւ մեր խնդիրն է հայկականը համատեղել եվրոպական նորամուծությունների, ժամանակակից միտումներ հետ:

-Բացի «Մանկական Եվրատեսիլ- 2011»-ի այս տարվա սարերի  տեսքով երաժշտական էկվալայզեր տարբերանշանից, էլ որտե՞ղ կարտահայտվեն ազգային տարրերը:

-Նաեւ բեմի ձեւավորման մեջ: «Եվրատեսիլ»-ը պարզապես մեկ օր չէ, հանդիսատեսն այն դիտում է ընդամենը երկու ժամ`  պատկերացում անգամ չունենալով,  թե այդ երկու ժամվա համար քանի մարդ է աշխատում, որքան ժամանակ, ջանք եւ գումար է ներդրվում այդ ամենի կազմակերպման համար: Բայց դա առաջին հերթին շատ կարեւոր է մեր երկրի համար, որովհետեւ մեզ դիտելու են միլիոնավոր հեռուստադիտողներ: Հեռարձակման իրավունք ստանում են ավելի մեծ թվով երկրներ, քան մասնակից` 13 երկրները, այդ պատճառով պատասխանատվությունը կրկնակի մեծ է: Մենք բոլորս պետք է հասկանանք, որ «Մանկական Եվրատեսիլ»-ը միայն Հանրային հեռուստաընկերության նախագիծը չէ, այլ հայրենիքի` Հայաստանի  համար շատ կարեւոր նախագիծ: Թիմային լավ աշխատանքի շնորհիվ ստեղծվել են յուրաքանչյուր մասնակից երկրի տեսանյութ-բացիկները, որոնք շատ հուզիչ, տեղեկատվական առումով հագեցած, ստեղծագործական են լինելու: Չէի ցանկանա բացել բոլոր անակնկալները, սակայն այդ տեսանյութ-բացիկներում հետաքրքիր սցենարների միջոցով կարտահայտվի նաեւ «Հասի՛ր բարձունքին» խորհրդանշական գաղափարը: Մենք երբեւէ նմանատիպ մեծ նախագիծ չենք իրականացրել, որն  իսկապես բարդ է, պահանջում է  մանրակրկիտ մոտեցում, թիմային աշխատանք: Կարծում եմ`  «Մանկական Եվրատեսիլ»-ի փորձը մեզ հնարավորություն կտա առաջիկայում ավելի մեծ համարձակությամբ, վստահությամբ ներկայանալ այլ` ավելի մեծ մասշտաբ ունեցող նախագծերում:

-«Մանկական Եվրատեսիլ- 2011» գլխավոր կազմակերպիչ` Եվրոպական հեռարձակողների միության ղեկավար, համակարգող Սիթցե Բեքքերը  մամլո ասուլիսներից մեկում նշել է, որ Հայաստանը  մրցույթում ներկայացնելու է ամենալավը, ի՞նչ նկատի ուներ նա «ամենալավը» ասելով:

-Հավանաբար այն, որ մենք անելու ենք ամենալավը` առավելագույնը  մեր հնարավորությունների սահմանում:  Եվ իսկապես այդպես է,  մենք ջանք ու եռանդ չենք խնայելու լավագույնս ներկայանալու համար: «Եվրատեսիլ»-ը նաեւ տուրիստական, մշակութային առումով շատ կարեւոր իրադարձություն է, որտեղ ամեն ինչ պետք է լինի ճիշտ, մանրակրկիտ մշակված:

-Հայտնի է, որ «Մանկական Եվրատեսիլ»-ի շրջանակներում Հայաստան են ժամանելու  մոտ 500 հյուրեր, 5 000 երկրպագուներ, պարզապես  «Եվրատեսիլ»-ով հետաքրքրված մարդիկ: Ի՞նչ միջոցառումներ են նախատեսված նրանց համար մրցույթի շրջանակներում:

-Դա մարդկանց մոտավոր քանակն է, թե որքա՞ն մարդ կմասնակցի «Եվրատեսիլ»-ին, հնարավոր չէ վերջնականապես ասել, սակայն արդեն իսկ մարդկանց հետաքրքրությունը, հատկապես`այլ երկրներից, զգալի է: Պատվիրակություններից յուրաքանչյուրն ունի մշակված, նախապես պլանավորված ծրագիր` օրակարգ, որոնց մեջ ներառված են տարատեսակ էքսկուրսիաներ, այցելություններ պատմամշակութային վայրեր Երեւանում եւ նրա սահմաններից դուրս, հետաքրքիր, զվարճալի  միջոցառումներ, խնջույքներ: Բնականաբար նրանք առիթ կունենան ծանոթանալու նաեւ ավանդական հայկական խոհանոցին: Մարդիկ հենց այնպես` ինքնանպատակ չեն գալու մեր երկիր, կարեւոր է, որ իրենց այցից լավ տպավորություններ ստանան, հիանալի ժամանակ անցկացնեն: Ի վերջո մրցույթում մասնակցելը միայն հաղթանակով չի որոշվում, այն լավ հնարավորություն է նոր ծանոթություններ, ընկերներ, գործնական կապեր ձեռք բերելու, բազմաթիվ նոր համատեղ նախագծեր իրականացնելու եւ համագործակցելու համար: Ամեն ինչ արվում է, որպեսզի մարդիկ Հայաստանից մեկնելիս միմիայն լավ հուշեր տանեն իրենց հետ եւ մեկ շաբաթվա ընթացքում մտածեն միայն իրենց ելույթի մասին: Մրցութի կազմակերպիչների կողմից դա միտումնավոր է  արված, որպեսզի երեխայի մոտ չառաջանա հաղթողի կամ պարտվողի` մրցակցության զգացողություն:  Սա ուղղակի մեծ երաժշտական տոն է:

-Շատ արտասահմանյան ԶԼՄ-ներ անդրադարձան կայանալիք «Մանկական Եվրատեսիլ»-ին նաեւ հայ- ադրբեջանական հարաբերությունների ենթախորքում: Հայտնի՞ է արդյոք Ադրբեջանի եւ Թուրքիայի հայտ չներկայացնելու վերջնական պատճառը:

- Մենք հյուրընկալող երկիր ենք, եւ նման հարցերով զբաղվելը մեր գործառույթը չէ: Սովորաբար պատճառները շատ տարբեր են լինում, առաջինը` ֆինանսական, երբ երկրները մեծերի «Եվրատեսիլ»-ից հետո այդքան բյուջե չեն նախատեսում  «Մանկական Եվրատեսիլ»-ին մասնակցելու համար: Իրականում յուրաքանչյուր երկրից այս միջոցառմանը մասնակցելու համար լուրջ ֆինանսական միջոցներ, հովանավորներ եւ աշխատանք է պահանջվում: Մեր գործը չէ նրանց հայտ չներկայացնելը քննարկելը, մենք պատրաստ էինք ընդունել բոլոր նրանց, ովքեր մասնակցության հայտ կներկայացնեին: Չմասնակցելու պատճառներից մեկն էլ հաճախ կարող է լինել հեռարձակման ժամային գոտիների անհամապատասխանությունը, մի մասն էլ կարծում է, որ դա ավելորդ  սթրես է երեխաների համար` խուսափելով մանկական թոհուբոհից: Ժամանակի բացակայությունը եւս կարող է չմասնակցելու պատճառ դառնալ:

 -»Մանկական Եվրատեսիլ-2011»-ի մամլո քարտուղար Տիգրան Դանիելյանը  ռուսական լրատվամիջոցներից մեկին տված հարցազրույցում նշել է, որ նոյեմբերի 25-ին` մասնակիցների ժամանման օրը, նրանցից մեկի ժամանումը  մեծ անակնկալ է լինելու, կբացե՞ք փակագծերը:

-Անակնկալներն իսկապես ապահովված են, նրանք անպակաս են լինելու մրցույթից, ընդ որում` միայն լավ անակնկալներ` ոչ միայն մասնակիցների ժամանման հետ կապված, այլեւ մրցութի ողջ ընթացքում:  Անակնկալները կապված են լինելու նաեւ հատուկ հյուրերի հետ. բացի մասնակիցներից, ելույթ  են ունենալու ամենացանկալի, ամենագեղեցիկ հատուկ հյուրերը: Այնպես որ սպասե՛ք այդ անակնկալներին…

- Կար տարածված  վարկած, որ  Դուք  եւ հայտնի շոումեն Գարիկ Մարտիրոսյանն եք վարելու մրցույթը, հայտնի՞ են արդյոոք մրցույթի հաղորդավարների անունները:

- Դա եւս անակնալների շարքից է, չեմ ուզում բացել բոլոր գաղտնիքները: Մրցույթի վարողների անունները հրապարակվեն ավելի ուշ:  Լինելու են երկու հաղորդավարներ, որոնց թեկնածությունը հաստատման փուլում է:

-Բաքվում կայանալիք մեծահասակների «Եվրատեսիլ»-ին Հայաստանի  մասնակցության վերաբերյալ կա՞ն նոր մանրամասներ:

-Ադրբեջանը` որպես Եվրատեսիլի կազմակերպիչ երկիր, պարտավոր է երաշխավորել յուրաքանչյուր պատվիրակության անվտանգությունը, սակայն պետք չէ մոռանալ, որ մենք անհատական հարց ունենք, սուբյեկտիվ մոտեցման անհրաժեշտություն, որպեսզի վստահորեն կարողանանք մասնակցել: Ես չէի ուզենա այս շրջանում իմ անձնական կարծիքն արտահայտել, քանի որ այդ թվում արտասահմանյան լրատվամիջոցները կարող են այն որպես մեր հեռուստաընկերության կարծիք ընկալել: Պարզապես մենք ակնկալում ենք լուրջ, կատարյալ անվտանգության երաշխիքներ:

-Օրեր առաջ նկարահանվեց «Մանկական Եվրատեսիլ- 2011»-ի հայաստանյան ներկայացուցչի` Դալիթայի Welcome to Armenia երգի տեսահոլովակը, ի՞նչ արձագանքներ է ստացել մեր մասնակցի երգը:

-Շնորհալի, գեղեցիկ եւ հեռանկարային աղջիկ է Դալիթան, ում  երգը շատ թեմատիկ է: Իմաստն այն է, որ նա այս երգի միջոցով բոլորի հետ ընկերանում է եւ կանչում Հայաստան: Այս առումով իսկապես ճիշտ ընտրված եւ գտնված երգ է: Վստահ եմ, որ նա շատ լավ ելույթ կունենա` ներկայացնելով մեր երկիրն այս մրցույթյում: Մրցույթի կանոնների համաձայն` հաղթող կրկին  կարող է ճանաչվել նույն երկիրը: Չկա որեւէ սահմանափակում, այնպես որ մենք հաղթանակի մեծ հույսեր ունենք:

- Հաջողություն  մաղթելով Ձեր ստեղծագործական թիմին եւ մեր մասնակցին` կցանկանայի տեղեկանալ, թե մինչեւ դեկտեմբերի 3-ը, ավարտին հասցնելու ի՞նչ հիմնական աշխատանքներ են մնացել:

-Բեմի կառուցումը, կազմակերպչական եւ այլ տեսակի մի շարք աշխատանքներ, ներառյալ` Երեւանի արտաքին տեսքը: Մեր մայրաքաղաքը մեծ քայլերով նախապատրաստվում է «Մանկական Եվրատեսիլ- 2011»-ին` վերածվելով եվրատեսիլյան քաղաքի:

Հարցազրույցը`  Տաթեւիկ Գրիգորյանի