361.4
Հայաստանի ՆԳՆ փրկարար ծառայության տնօրենն ու Պեկինի փոխքաղաքապետը կարևորել են փորձի փոխանակումն ու համագործակցության ընդլայնումը
3 րոպեի ընթերցում
Հայաստանի ՆԳՆ Փրկարար ծառայության տնօրեն-ՆԳ նախարարի տեղակալ Արամ Ղազարյանը Սևանի ջրափրկարարական ջոկատի նորաբաց վարչական համալիրում հյուրընկալել է Կենսաբազմազանության մասին կոնվենցիայի կողմերի 17-րդ համաժողովի (COP17) շրջանակում Հայաստան ժամանած՝ Չինաստանի Ժողովրդական Հանրապետության մայրաքաղաք Պեկինի փոխքաղաքապետ Վեն Սյանի գլխավորած պատվիրակությանը։
«Արմենպրես»-ի փոխանցմամբ՝ Փրկարար ծառայության տարածած հաղորդագրության մեջ նշվում է, որ Արամ Ղազարյանի ուղեկցությամբ պատվիրակության անդամները ծանոթացել են ջոկատի տեխնիկական հագեցվածությանը՝ ջրափրկարարական գույքին, մասնագիտացված սարքավորումներին և տեխնիկական միջոցներին։ Ներկայացվել են դրանց գործառնական նշանակությունն ու հնարավորությունները, կիրառման առանձնահատկությունները։
Պատվիրակության անդամները շրջայց են կատարել նաև վարչական համալիրում՝ ծանոթանալով շենքային պայմաններին, առկա ենթակառուցվածքներին, ծառայողական և աշխատանքային տարածքների հագեցվածությանը։
Շրջայցի ավարտին տեղի է ունեցել աշխատանքային խորհրդակցություն, որի ընթացքում կողմերը քննարկել են աղետների ռիսկերի կառավարման, հրդեհաշիջման և փրկարարական աշխատանքների կազմակերպման ոլորտներում համագործակցության զարգացման հեռանկարներն ու մասնագիտական փորձի փոխանակման հնարավորությունները։
Արամ Ղազարյանն ընդգծել է միջազգային համագործակցության կարևորությունը՝ մասնագիտական կարողությունների զարգացման, ժամանակակից տեխնոլոգիաների և նորագույն տեխնիկական միջոցների ներդրման, ինչպես նաև բնակչության անվտանգության ապահովման արդյունավետության բարձրացման գործում։
Պեկինի փոխքաղաքապետ Վեն Սյանը բարձր է գնահատել Սևանի ջրափրկարարական ջոկատի տեխնիկական հագեցվածությունն ու անձնակազմի համար ստեղծված աշխատանքային պայմանները։ Նա անդրադարձել է Պեկինում ջրային տարածքների անվտանգության ապահովման փորձին՝ ներկայացնելով ջրահեղձման դեպքերի կանխարգելման, բնակչության իրազեկվածության բարձրացման և ջրային տարածքներում փրկարարական ծառայությունների գործունեության արդյունավետ կազմակերպման ուղղությամբ իրականացվող աշխատանքները։
Հաշվի առնելով Հայաստանի և Չինաստանի միջև ձևավորված բարեկամական հարաբերությունների կարևորությունը՝ կողմերը վերահաստատել են փոխադարձ հետաքրքրություն ներկայացնող ուղղություններով համագործակցությունն ընդլայնելու պատրաստակամությունը։
Բաժանորդագրվեք մեր ալիքին Telegram-ում