Մշակույթ

«Պատմություն՝ հնչողությամբ մեկ դար». կայացել է Ազգային ֆիլհարմոնիկ նվագախմբի 100-ամյակին նվիրված ֆիլմի պրեմիերան

4 րոպեի ընթերցում

«Պատմություն՝ հնչողությամբ մեկ դար». կայացել է Ազգային ֆիլհարմոնիկ նվագախմբի 100-ամյակին նվիրված ֆիլմի պրեմիերան

Հայաստանի ազգային ֆիլհարմոնիկ նվագախմբի 100-ամյակի շրջանակում արվեստասերներին է ներկայացվել «Պատմություն՝ հնչողությամբ մեկ դար» վավերագրական ֆիլմը։

«Արմենպրես»-ի հաղորդմամբ՝ ֆիլմն անդրադառնում է նվագախմբի պատմությունը, որը ներկայացնում է Ֆիլհարմոնիկի գեղարվեստական ղեկավար և գլխավոր դիրիժոր Էդուարդ Թոփչյանը:

Ֆիլմում նվագախմբի հետ համագործակցության մասին են խոսում աշխարհահռչակ մենակատարներ ու դիրիժորներ՝ Պլասիդո Դոմինգո, Վալերի Գերգիև, Մարկ Ալբրեխտ, Ավգուստին Հադելիխ, Սերգեյ Խաչատրյան և այլք:

«Սա յուրօրինակ ֆիլմ-այցեքարտ է, որտեղ հիմնական շեշտը դրված է ներկայիս նվագախմբի վրա՝ ներկայացնելով, թե ինչ նվաճումների է այն հասել մեկ դար անց և ինչ առանցքային դերակատարում ունի Հայաստանի մշակութային կյանքում և միջազգային հեղինակավոր հարթակներում։ Ֆիլմն առանձնանում է դինամիկ, ժամանակակից օպերատորական և մոնտաժային գեղարվեստական լուծումներով»,-ասվում է հաղորդագրության մեջ։

Անդրադառնալով ֆիլմի ստեղծմանն ու նվագախմբի հոբելյանին՝ Էդուարդ Թոփչյանը նշում է. «Հայաստանի ազգային ֆիլհարմոնիկ նվագախմբի 100-ամյակը պարզապես հոբելյանական տարեթիվ չէ, սա մեր ազգային ինքնության, մշակութային դիմադրողականության և անսպառ նվիրումի տարեգրությունն է։ Այս ֆիլմը հրաշալի հնարավորություն է հետադարձ հայացք գցելու մեզ թողած հարուստ ժառանգությանը և միաժամանակ արձանագրելու այն բարձր նշաձողը, որին այսօր հասել է նվագախումբը։ Ուրախ եմ, որ մեր հանդիսատեսն ու միջազգային գործընկերները կտեսնեն էներգիայով լեցուն, յուրօրինակ, հարուստ ու ջերմ հնչողությամբ, մշտապես դեպի ապագա միտված մի նվագախմբի, որն արժանիորեն ներկայացնում է Հայաստանը համաշխարհային բեմերում»։

«Պատմություն՝ հնչողությամբ մեկ դար» վավերագրական ֆիլմի ստեղծագործական աշխատանքը հիմնված է սցենարիստ, երաժշտագետ, լրագրող Ռուզաննա Մկրտչյանի և բեմադրող օպերատոր, ռեժիսոր, միջազգային մրցանակների արժանացած,  հարյուրավոր հայկական և արտասահմանյան ֆիլմերի (այդ թվում՝ մեծ վարպետ Արտավազդ Փելեշյանի ֆիլմերի) բեմադրող օպերատոր Վահագն Տեր-Հակոբյանի ստեղծագործական տանդեմի վրա։ Վերջին շրջանում նրանց համագործակցության արդյունքում ստեղծվել են նաև մի շարք նշանավոր հայ երաժիշտների վավերագրական ֆիլմ-դիմանկարներ։

Ֆիլմի ռեժիսոր և բեմադրող օպերատոր Վահագն Տեր-Հակոբյանը նշում է. «Այս ֆիլմն ինձ համար կարևորվում է նրանով, որ թեև այն դոկումենտալ է, բայց իմ առջև խնդիր եմ դրել  ստանալ գեղարվեստական արժեք ներկայացնող ֆիլմ։ Փորձ է արվել համադրել նվագախմբի բարձր մակարդակի կատարողական վարպետությունը մեր հայրենիքի հիասքանչ և գեղեցիկ բնության հետ, որտեղից ծնունդ են առել նվագախմբի երաժիշտներն ու հայ երաժշտարվեստը, նաև Երևան քաղաքի մթնոլորտի հետ, որտեղ մեկ դար առաջ ծնվեց իր զարգացումն ապրեց նվագախումբը։ Ինչքանով է դա հաջողվել, կդատի հանդիսատես-ունկնդիրը»։

Սցենարի հեղինակ Ռուզաննա Մկրտչյանի խոքով՝ այս ֆիլմը միայն նվագախմբի անցած մեկդարյա պատմության վավերագրումը չէ։ «Սա, թերևս, նվագախմբի յուրօրինակ այցեքարտն է, որտեղ մեր ազգային արժեքը հանդիսացող կոլեկտիվի մասին իրենց անկեղծ հիացմունքն ու բարձր գնահատականն են արտահայտում համաշխարհային երաժշտարվեստի լեգենդները՝ նվագախմբի հետ ելույթ ունեցած հանրահայտ մենակատարներն ու դիրիժորները»,-նշում է Մկրտչյանը։

Ֆիլմը նկարահանվել է ՀՀ կրթության, գիտության, մշակույթի և սպորտի նախարարության աջակցությամբ։

AREMNPRESS

Հայաստան, Երևան, 0001, Աբովյան 9

+374 10 539818
[email protected]
fbtelegramyoutubexinstagramtiktokdzenspotify

Ցանկացած նյութի ամբողջական կամ մասնակի վերարտադրման համար անհրաժեշտ է «Արմենպրես» լրատվական գործակալության գրավոր թույլտվությունը

© 2026 ARMENPRESS

Ստեղծվել է՝ MATEMAT-ում