Նախնական բարձրագույն կրթություն ունեցող բոլոր անձինք կարող են մասնակցել հեռավար կրթության ծրագրին
ԵՐԵՎԱՆ, 3 ԱՊՐԻԼԻ, ԱՐՄԵՆՊՐԵՍ: Նախնական բարձրագույն կրթություն ունեցող անձինք հնարավորություն կունենան մասնակցել «Հեռավար շարունակական կրթության կազմակերպում» ծրագրին ու ստանալ գիտելիքներ` հիմնականում հասարակագիտական առարկաներից: «Արմենպրես»-ի փոխանցմամբ, ծրագիրն իրականացվում է ՀՀ ԳԱԱ միջազգային կենտրոնի կողմից` ուղղված շարունակական կրթության կազմակերպմանը:
«Հեռավար շարունակական կրթության կազմակերպում» ծրագրի ղեկավար Արուսյակ Հարությունյանի խոսքով, Երևանում և ՀՀ մի քանի մարզերում անցկացվել է սոցիոլոգիական հետազոտություն, իրականացվել կարիքների գնահատում, ինչի արդյունքում էլ հեռավար կրթության ծրագրում ներգրավվել են այնպիսի առարկաներ, ինչպիսիք են հասարակայնության հետ կապերը, մարդկային ռեսուրսների կառավարումը, բինզեսի կառավարումը, ֆինանսաբանկային, տուրիզմի ոլորտի առարկաները և այլն: «Սոցիոլոգիական հետազոտությունն իրականացրել ենք ֆոկուս խմբերի մեթոդի կիրառմամբ, որի ժամանակ քննարկման մասնակիցները, այդ թվում, զբաղվածության կենտրոնի ղեկավարները, առաջարկել են հիմնականում հումանիտար ոլորտի առարկաներ, որոնք էլ դարձել են ծրագրի մի մասը»,-նշեց ծրագրի ղեկավարը:
«Հեռավար շարունակական կրթության կազմակերպում» ծրագրի համակարգող Նարինե Վարդանյանը տեղեկացրեց, որ այս տարի ծրագրի շրջանակներում կրթությունը լինելու է անվճար, իսկ դասընթացները` հայերեն: «Հեռավար հարթակում բազմաթիվ դասընթացներ կան, որոնք տեղադրված են աշխարհի լավագույն համալսարանների կայքերում, բայց քանի որ դրանք անգլերեն են, հայ հասարակության լայն խավեր չեն կարողանում ինտեգրվել կամ լրացնել իրենց կրթության բացերը: Այս ծրագիրը գալիս է այդ բացը լրացնելու: Դասընթացների նպատակն է օգնել այն մարդկանց, ովքեր այսօր աշխատաշուկայում չեն գտնում աշխատանք կրթական բացթողումների պատճառով կամ ցանկանում են առավել լավ աշխատանքի անցնել, բայց որոշակի հմտությունների պակաս են զգում»,-ասաց Նարինե Վարդանյանը:
Արուսյակ Հարությունյանը տեղեկացրեց, որ ծրագրի ընդհանուր բյուջեն 74 միլիոն դրամ է կազմում, ամբողջ ծրագրի պաշտոնական տևողությունը 15 ամիս է` ներառյալ նախապատրաստական փուլը: Ծրագիրը կավարտվի 2015 թվականի դեկտեմբերին: Դասընթացներն սկսվելու են այս տարվա սեպտեմբերին:
Ծրագրի իրականացնողները չորսօրյա դասընթացներ են ստացել Պարմայի համալսարանի պրոռեկտոր, հեռավար կրթության կազմակերպման փորձագետ Աննա Մարիա Թամմարոյից, ով ծրագրի հետագա փուլերում ևս խորհրդատվություն է տրամադրելու:
Դասընթացներին մասնակցել ցանկացողները, ովքեր ունեն նախնական բարձրագույն կրթություն(բակալավրի աստիճան), կարող են այցելել հետևյալ հասցեով` www.isec.am և գրանցվել: Յուրաքանչյուր դասընթացի համար նախատեսված է ներածական բաժին, որտեղ ցանկացողները կարող են ծանոթանալ տվյալ առարկայի դասավանդման ձևին, տևողությանը:
Բաժանորդագրվեք մեր ալիքին Telegram-ում