«Ֆլեշ» ընկերության ու «Kotler Impact»-ի ներկայացուցիչ «AWE Consulting»-ի միջև ստորագրվեց հուշագիր

ԱՊՀ երկրներում «Kotler Impact»-ի ներկայացուցիչ «AWE Consulting»-ն ու «Ֆլեշ» ընկերությունը  ստորագրեցին համագործակցության հուշագիր:

Ստորագրված հուշագրի շրջանակում նախատեսվում է «Ֆլեշ» ընկերության  հաջողության պատմությունն ընդգրկել պրոֆեսոր Ֆիլիպ Կոտլերի հեղինակած  «Ժամանակակից մարքեթինգի հիմունքներ. Հայաստանի հրատարակություն» գրքում։

«Արմենպրես»-ի հետ զրույցում ԱՊՀ  երկրներում «Kotler Impact» ընկերության ներկայացուցիչ, «AWE Consulting» ՍՊԸ-ի Հայաստանի գործընկեր Մերի Գրիգորյանը նշեց՝ «Ֆլեշ»-ը վառելիք ներմուծող առաջատար ընկերություն է և տարիների ընթացքում ստեղծել է մրցունակ բրենդ և վստահելի գործընկերային հարաբերություններ:

««Ֆլեշ» ընկերությունը հայտնի է իր նորարարական լուծումներով և հաճախորդամետ մոտեցմամբ: Ընկերության հաջողության պատմությունը կարևոր օրինակ կդառնա ուսանողների, մարքեթինգի մասնագետների և բիզնես համայնքի համար՝ ցույց տալով, թե ինչպես է հնարավոր հայաստանյան շուկայում զարգացնել մրցունակ բրենդ »,- ասաց  Մերի Գրիգորյանը:

«Ֆլեշ» ընկերության գլխավոր տնօրեն Սանասար Բեգլարյանը պատմեց, որ ընկերությունը հիմնադրվել է 1995 թվականին և զբաղվել է վառելիքի մեծածախ և մանրածախ վաճառքով:

«Սակայն, արդեն մեկ տարի է՝ մենք ոլորտի ուղղություն ենք փոխել. այժմ ընկերությունը դիրքավորվել է որպես ճանապարհային ենթակառուցվածքներում ծառայություններ մատուցող ընկերություն: 

Այսուհետ, բացի ավանդական վառելիքից, սպառողները մեր ենթակառուցվածքներում կարող են  օգտվել  նաև խանութներից և արագ սնվելու հնարավորությունից: Ինչպես նաև, այս տարի շատ կետերում կլինեն  էլեկտրական գերարագ լիցքավորիչներ»,- ասաց Բեգլարյանը:

Նա ընդգծեց՝ շատ են  կարևորում «Kotler Impact» ընկերության ներկայացուցիչ, «AWE Consulting» ՍՊԸ-ի հետ համագործակցությունը, ինչի արդյունքում հնարավորություն կունենան ներկայացնելու ընկերության 30 տարվա անցած ուղին:

«Կարևոր ենք համարում, որպեսզի մեր պատմության մեջ  նշվեն նաև այն անհաջողությունները, որոնք հետագայում վերածվել են հաջողության: Կրթությունը կարևոր բաղադրիչ է, կարծում եմ՝ դա է վաղվա գրավականը: Հայաստանում ստեղծված քիչ ընկերություններ կան, որոնք այսքան տարիների պատմություն ունեն:  Մեր անցած ճանապարհի ընթացքում հավաքել ենք մի շարք ուսուցողական նյութեր,  որոնք ցանկանում ենք տրամադրել մեր գալիք սերունդին»,- նշեց  Սանասար Բեգլարյանը:

«Ժամանակակից մարքեթինգի հիմունքները»-ը պրոֆեսոր Ֆիլիպ Կոտլերի և «Kotler Impact»-ի վերջին համաշխարհային նախաձեռնությունն է: Այն իրականանում է աշխարհի 50-ից ավելի երկրում, այդ թվում՝ Հայաստանում: 

 Յուրաքանչյուր երկրի հրատարակությունում տեղ են գտնում տվյալ երկրում գործունեություն ծավալող լավագույն ընկերությունների հաջողության պատմությունները և նրանց իրականացրած մարքեթինգային ռազմավարությունները: «Ժամանակակից մարքեթինգի հիմունքներ. Հայաստանի հրատարակություն» գիրքը լույս կտեսնի 2025 թվականին՝ հայերեն և անգլերեն: