Գրոսին Ուկրաինայում տեղի ունեցող մարտերը համարում է գլխավոր ռիսկը միջուկային անվտանգության համար
1 րոպեի ընթերցում
Ուկրաինայում տեղի ունեցող մարտական գործողությունները հիմնական ռիսկն են գլոբալ միջուկային անվտանգության համար, հայտարարել է Ատոմային էներգիայի միջազգային գործակալության գլխավոր տնօրեն Ռաֆայել Գրոսին ԱԷՄԳ Կառավարիչների խորհրդի հերթական նստաշրջանում: Այդ մասին «Արմենպրես»-ը տեղեկանում է ՏԱՍՍ գործակալությունից:
«Այսօր միջուկային անվտանգության համար գլխավոր ռիսկը մնում է Ուկրաինայում պատերազմը: Այն, որ այնտեղ մինչև հիմա միջուկային միջադեպ տեղի չի ունեցել, չի նշանակում, թե դա չի կարող տեղի ունենալ ապագայում: Ըստ էության, այդ ռիսկն աճում է զինված հակամարտության էսկալացմանը զուգահեռ», - ասել է նա:
ԱՄԷԳ գլխավոր տնօրենը նաև ուշադրություն է հրավիրել Զապորոժիեի ատոմակայանում (ԶԱԷԿ) օգտագործվող ջրի սառեցման խնդրին երկարաժամկետ լուծում գտնելու անհրաժեշտության վրա:
«Չափազանց մեծ կարևորություն ունի ԶԱԷԿ-ում միջուկային միջադեպի կանխման խնդիրը: Նույնիսկ հաշվի առնելով բոլոր վեց ռեակտորների սառը դադարի ռեժիմում գտնվելու փաստը, պետք է գտնել կայանում օգտագործվող ջրի սառեցման երկարաժամկետ լուծում», - նշել է Գրոսին: