Գրոսին հույս ունի, որ ԱՄՆ-ն միջուկային փորձարկումներ չի անցկացնի

Ներկա դրությամբ աշխարհում չի գրանցվել միջուկային փորձարկումների որևէ նշան: Ինչպես «Արմենպրես»-ը տեղեկանում է «ՌԻԱ Նովոստի» գործակալությունից, այդ մասին հայտարարել է Ատոմային էներգիայի միջազգային գործակալության (ԱԷՄԳ) գլխավոր տնօրեն Ռաֆայել Գրոսին՝ մեկնաբանելով այլ երկրների կողմից ենթադրաբար անցկացված միջուկային փորձարկումների վերաբերյալ ԱՄՆ նախագահ Դոնալդ Թրամփի հայտարարությունները։

«Ինչպես գիտեք, Վիեննայում մենք ունենք մի կազմակերպություն, որը հսկում է միջուկային զենքի փորձարկումները։ Եվ մոնիթորինգի համակարգի համաձայն՝ նման փորձարկումների անցկացման մասին վկայող որևէ իրադարձություն չի եղել, և ես հույս ունեմ՝ այդպես էլ կլինի հետագայում», - ասել է Գրոսին՝ պատասխանելով համապատասխան հարցին։

Ավելի վաղ Թրամփը հայտնել էր, որ կարգադրել է միջուկային զենքի փորձարկումներ անցկացնել «հավասար հիմունքներով» այն երկրների հետ, որոնք ենթադրաբար ունեն համապատասխան ծրագրեր։ ԱՄՆ պետքարտուղար Մարկո Ռուբիոն ավելի ուշ հայտնել է, որ Միացյալ Նահանգների նախագահի՝ միջուկային փորձարկումները վերսկսելու մասին հայտարարությունն ուղղված է զենքի անվտանգությունը ստուգելուն։

Գրոսին Կալինինգրադում հանդիպում է անցկացրել «Ռոսատոմ»-ի ղեկավար Ալեքսեյ Լիխաչովի հետ։