Եվրոպա

Ուիթքոֆն արդյունավետ է որակել Բեռլինում եվրոպացիների հետ բանակցություններն Ուկրաինայի հարցով

4 րոպեի ընթերցում

Ուիթքոֆն արդյունավետ է որակել Բեռլինում եվրոպացիների հետ բանակցություններն Ուկրաինայի հարցով

ԱՄՆ նախագահի հատուկ բանագնաց Սթիվ Ուիթքոֆը կարծում է, որ Բեռլինում կայացած «Կամեցողների կոալիցիայի» հանդիպման ընթացքում եվրոպական երկրների ղեկավարները Ուկրաինայի ճգնաժամի կարգավորման հարցում լուրջ տրամադրվածություն են դրսևորել։ «Արմենպրես»-ի փոխանցմամբ՝ այս մասին նա գրել է X սոցիալական հարթակում։

«Քննարկումն անկեղծ և արդյունավետ էր», - գրել է Ուիթքոֆը, որը հանդիպմանը մասնակցել է ԱՄՆ նախագահի բանագնաց Ջարեդ Քուշների հետ։

«Բեռլինում մեր խնդիրը եվրոպացի գործընկերների հետ ուղիղ շփումն էր, կարծիքների փոխանակումն ու հետագա քայլերի քննարկումը։ Մենք բովանդակալից և անկեղծ քննարկումներ ունեցանք և բարձր ենք գնահատում բոլոր մասնակիցների դրսևորած լուրջ տրամադրվածությունն ու հանձնառությունը։ Դեռևս կարևոր աշխատանք կա կատարելու, և մենք կշարունակենք այդ ջանքերը մեր դաշնակիցների հետ սերտ համակարգմամբ՝ կայուն խաղաղություն հաստատելու նպատակով», - հայտարարել է Ուիթքոֆը։

Ուկրաինայի հարցով բանակցություններին եվրոպական կողմից ընդգրկված են Եվրոպական հանձնաժողովը, Եվրոպական խորհուրդը, ինչպես նաև «Կամեցողների կոալիցիայի» հինգ երկրները՝ Գերմանիան, Ֆրանսիան, Իտալիան, Լեհաստանը և Մեծ Բրիտանիան։

Ուիթքոֆը նաև նշել է, որ ԱՄՆ նախագահ Դոնալդ Թրամփը վճռական է՝ վերջ դնելու «այս սարսափելի պատերազմին»:

«Մենք վճռական ենք այս գործընթացը կյանքի կոչելու այնպես, որ լիովին երաշխավորվեն Ուկրաինայի անվտանգությունն ու ինքնիշխանությունը, և կանխվի հակամարտության կրկնությունը», - հավելել է հատուկ բանագնացը։

Հանդիպումից հետո կայացած մամուլի ասուլիսում Ուիթքոֆը նաև հայտնել է, որ նոյեմբերի 19-ին Շենժենում Չինաստանի և Ռուսաստանի նախագահների հետ եռակողմ հանդիպման ժամանակ ԱՄՆ նախագահը հատուկ ուշադրություն է նվիրել ռուս-ուկրաինական հակամարտության կարգավորման հարցերին, և իր բանագնացներին հանձնարարել է անել հնարավոր ամեն բան պատերազմի դադարեցման համար։

Իր հերթին, Ջարեդ Քուշները հանդիպումից հետո X հարթակում գրել է, որ Եվրոպան միասնական է և ամուր Ուկրաինային աջակցության հարցում, սակայն միևնույն ժամանակ ցանկանում է, որ խաղաղություն հաստատվի։ Քուշները նշել է, որ զգալի առաջընթաց է գրանցվում կողմերին բանակցային սեղանի շուրջ բերելու հարցում։

Կարդացեք հոդվածը` Русский
AREMNPRESS

Հայաստան, Երևան, 0001, Աբովյան 9

+374 10 539818
[email protected]
fbtelegramyoutubexinstagramtiktokdzenspotify

Ցանկացած նյութի ամբողջական կամ մասնակի վերարտադրման համար անհրաժեշտ է «Արմենպրես» լրատվական գործակալության գրավոր թույլտվությունը

© 2026 ARMENPRESS

Ստեղծվել է՝ MATEMAT-ում