Սպասվող լրահոս. 17.05.2016
ԵՐԵՎԱՆ, 17 ՄԱՅԻՍԻ, ԱՐՄԵՆՊՐԵՍ: «Արմենպրես» լրատվական գործակալությունը Լրատվական ռադիոյի եթերում ներկայացնում է այն ամենն, ինչի մասին կկարդաք, կլսեք ու կտեսնեք այսօրվա լրահոսում:
Հայաստանի նախագահ Սերժ Սարգսյանի` Վիեննա կատարած այցը քննարկումների առանցքում է: Վերլուծաբանները, քաղաքագետները վերլուծում են ղարաբաղյան հարցի շուրջ նոր զարգացումները: Ի՞նչ կփոխի նախագահի այցը Վիեննա, արդյո՞ք ղարաբաղյան հարցի շուրջ բանակցությունները նոր ընթացք են ստանում: Այսօր` մայիսի 17-ին, այս և այլ հարցերի կանդրադառնան Հայաստանի և այլ երկրների փորձագետները:
Այսօր կմեկնարկի հայ-լեհական տնտեսական համագործակցության միջկառավարական հանձնաժողովի հինգերորդ նիստը: Նիստի պաշտոնական բացմանը ողջույնի խոսքով հանդես կգան միջկառավարական հանձնաժողովի համանախագահներ` ՀՀ էկոնոմիկայի նախարարի առաջին տեղակալ Գարեգին Մելքոնյանը և Լեհաստանի Հանրապետության զարգացման նախարարի տեղակալ Ռադոսլավ Դոմագալսկի-Լաբեձկին: Նիստի շրջանակում երկու երկրների գործարար համայնքի շուրջ 35 ներկայացուցիչների մասնակցությամբ տեղի կունենա Հայաստան-Լեհաստան գործարար համաժողով:
Մայիսի 19-ին լրանում է Պոնտոսի հույների ցեղասպանության 97-րդ տարելիցը: Օրվան ընդառաջ Երևանի Վ.Բրյուսովի անվան պետական լեզվաբանական համալսարանում կներկայացվի Պոնտոսի հույների ցեղասպանությանը նվիրված «Արգոնավորդների ոտնահետքերով» ֆիլմի հայերեն թարգմանված տարբերակի ցուցադրությունը: Ֆիլմի ցուցադրությունից առաջ հույների Ցեղասպանության պատմությունը համառոտ կներկայացնի ցեղասպանագետ, պատմական գիտությունների թեկնածու Գևորգ Վարդանյանը:
ՀՀ Ազգային ժողովի նիստերի դահլիճի նախասրահում կկայանա «ՀԱՎԱՍԱՐ» խորագիրը կրող լուսանկարչական ցուցահանդեսի բացումը: Ցուցահանդեսի նպատակն է կին և տղամարդ քաղաքական գործիչների հետ համատեղ բարձրաձայնել կանանց քաղաքական մասնակցության կարևորությունը: Ցուցահանդեսը ներառում է հետևյալ երկու թեմատիկ շարքերը` Հայ քաղաքական գործիչների դիմանկարներ և տարբեր ոլորտներ ներկայացնող հայտնի կանանց ու տղամարդկանց դիմանկարներ՝ հավասար իրավունքների և հնարավորությունների կոչ-ուղերձներով:
ՀՀ մշակույթի նախարար Հասմիկ Պողոսյանն աշխատանքային այցով կմեկնի Արմավիրի մարզ: Նա կայցելի մի շարք մշակութային հաստատություններ, կծանոթանա խնդիրներին, արված աշխատանքին:
Թանգարանների միջազգային օրվան ընդառաջ Երևանի պատմության թանգարանի տնօրեն Արմինե Սարգսյանը կներկայացնի սպասվող միջոցառումները, կխոսի նաև հասարակության սոցիալ-մշակութային կյանքում թանգարանների դերի մասին:
Նորարար փորձառական արվեստի կենտրոնում ՀՀ սփյուռքի նախարարության աջակցությամբ տեղի կունենա «Արվեստ էքսպո-2016» միջազգային 2-րդ ցուցահանդեսի բացումը, որը կազմակերպել է հայրենադարձ նկարիչ Վագո Արմենո Խախամյանը: Ցուցահանդեսը նվիրված է ՀՀ անկախության 25-ամյակին, որին կմասնակցի 40 նկարիչ՝ աշխարհի 18 երկրից:
Այս և այլ թեմաների մասին կարող եք մանրամասն ընթերցել armenpress.am կայք էջում և լսել լրատվական ռադիոյի եթերում: Հետևեք մեզ թվիթերում և ֆեյսբուքում:
Բաժանորդագրվեք մեր ալիքին Telegram-ում