Չեխիայի խորհրդարանի փոխխոսնակի գրառումը ԼՂ-ում Ադրբեջանի գործողությունների վերաբերյալ բուռն արձագանք է առաջացրել Բաքվում

ԵՐԵՎԱՆ, 25 ՄԱՅԻՍԻ, ԱՐՄԵՆՊՐԵՍ։ Չեխիայի խորհրդարանի Պատգամավորների պալատի փոխնախագահ Յան Բարտոշեկի հայտարարությունը Լեռնային Ղարաբաղում Ադրբեջանի գործողությունների վերաբերյալ բուռն արձագանք է առաջացրել Բաքվում: «Արմենպրես»-ի հաղորդմամբ՝ Չեխիայում Հայաստանի դեսպան Աշոտ Հովակիմյանի հետ հանդիպումից հետո Բարտոշեկը «X»-ի իր միկրոբլոգում գրել է, որ պետք է չմոռանալ Հայաստանը։

«Հարյուր հազարավոր փախստականներ երկիր են ժամանել Ադրբեջանի կողմից օկուպացված Լեռնային Ղարաբաղից, որտեղ ակնհայտորեն արձանագրվել են մարդու իրավունքների խախտումներ: Նույնիսկ, եթե այդ մասին քիչ է ասվում հայրենի ԶԼՄ-ներում, հայերին մարդասիրական օգնություն է պետք: Այս և շատ այլ բաների մասին ես այսօր խոսել եմ Չեխիայում Հայաստանի Հանրապետության արտակարգ և լիազոր դեսպան Աշոտ Հովակիմյանի հետ»,- գրել է Բարտոշեկը։

Nezapomínejme na Arménii. Do země přišly statisíce uprchlíků z Ázerbájdžánem obsazeného Náhorního Karabachu, kde prokazatelně dochází k porušování lidských práv. I když se o tom v tuzemských médiích tolik nedozvíte, Arméni potřebují humanitární pomoc.

O tom a mnohém dalším jsem… pic.twitter.com/3y3jCfegzP

— Jan Bartošek (@honzabartosek) May 22, 2024

Հայտարարությունը զայրույթ է առաջացրել Ադրբեջանի պաշտոնատար անձանց մոտ: Ադրբեջանի ազգային ժողովի Չեխիայի հետ միջխորհրդարանական կապերի աշխատանքային խմբի ղեկավար Էլնուր Ալահվերդիևը մայիսի 24-ին խմբի անդամների անունից բողոքի նամակ է հղել Չեխիայի խորհրդարանի պատգամավորների պալատի չեխ-ադրբեջանական միջխորհրդարանական կապերի բարեկամության խմբի անդամներին: