388.33
ՀՀ ԱԳՆ-ն բողոքի նոտա է ներկայացրել բելառուսական կողմին
1 րոպեի ընթերցում
ԵՐԵՎԱՆ, 14 ՀՈՒՆԻՍԻ, ԱՐՄԵՆՊՐԵՍ: Հայաստանի Հանրապետության արտաքին գործերի նախարարությունը բողոքի հայտագիր է ներկայացրել բելառուսական կողմին: «Արմենպրես»-ի փոխանցմամբ՝ այս մասին «Ֆեյսբուք»-ի իր էջում գրել է ՀՀ ԱԳ նախարարության մամուլի խոսնակ Անի Բադալյանը:
«Բելառուսի ԱԳՆ խոսնակի՝ հունիսի 13-ի մեկնաբանության, մասնավորապես ՀՀ ներքին գործերին միջամտելու առնչությամբ բելառուսական կողմին ներկայացվել է բողոքի հայտագիր:
Հավելենք, որ երկրի ապագայի մասին մտածող ղեկավար ունենալու մաղթանքներ հղելիս մաղթողն ինքը պետք է սեփականն ունենա: Բելառուսի պարագայում այս պահին դա հիրավի շռայլություն է»,- ասված է խոսնակի գրառման մեջ:
Ավելի վաղ Բելառուսի ԱԳՆ-ն հայտարարություն էր տարածել՝ նշելով, որ իրենք հարգում են հայ ժողովրդին, չեն միջամտում Հայաստանի ներքին գործերին՝ միևնույն ժամանակ հեգնելով, թե «Հայաստանին մաղթում են ունենալ ղեկավարներ, որոնք կմտածեն երկրի ապագայի և մարդկանց բարօրության մասին»։
Հիշեցնենք, որ հունիսի 13-ին երկու երկրների դեսպանները հետ են կանչվել՝ խորհրդակցությունների նպատակով:
