ԵՄ դիտորդները ևս հերքել են Բաքվի մեղադրանքները հայկական կողմից իրենց դիրքերի ուղղությամբ կրակելու վերաբերյալ

ԵՐԵՎԱՆ, 14 ՀՈՒՆԻՍԻ, ԱՐՄԵՆՊՐԵՍ։ Հայաստանի Հանրապետությունում Եվրոպական միության դիտորդական առաքելությունը Հայաստանի և Ադրբեջանի սահմանին որևէ արտասովոր շարժում կամ միջադեպ չի նկատել։ ԵՄ դիտորդական առաքելությունն այսպիսով ևս հերքել է վերջին երկու օրերին Ադրբեջանի պաշտպանության նախարարության կողմից տարածվող կեղծ մեղադրանքները, թե ՀՀ ԶՈՒ ստորաբաժանումները կրակել են իրենց դիրքերի ուղղությամբ։  

«Արմենպրես»-ի հաղորդմամբ՝ այս մասին նշված է ՀՀ-ում ԵՄ դիտորդական առաքելության X-ի միկրոբլոգում կատարված գրառման մեջ։ 

EUMA continues its daily patrols on the Armenian side of the border with Azerbaijan. The Mission’s monitors haven’t observed any unusual movements or incidents.

— European Union Mission in Armenia (@EUmARMENIA) June 14, 2024

«ՀՀ-ում Եվրոպական միության դիտորդական առաքելությունը շարունակում է ամենօրյա պարեկությունը Ադրբեջանի հետ սահմանի հայկական կողմում։ Առաքելության դիտորդները որևէ արտասովոր շարժում կամ միջադեպ չեն նկատել», - նշվում է առաքելության գրառման մեջ։ 

Ադրբեջանի պաշտպանության նախարարությունը վերջին 2 օրերին կեղծ հաղորդագրություններ է տարածում, թե հայկական զինված ուժերի ստորաբաժանումներն իբր կրակ են բացել ադրբեջանական դիրքերի ուղղությամբ։ Ադրբեջանական կողմի մեղադրանքներն անմիջապես հերքվել են Հայաստանի պաշտպանության նախարարության կողմից։