2 րոպեի ընթերցում
ՄԻՆՍԿ, 21 ՀՈՒՆՎԱՐԻ, ԱՐՄԵՆՊՐԵՍ: Այսօր Ալեքսանդր Լուկաշենկոն չորրորդ ժամկետով ստանձնել Է Բելառուսի նախագահի պաշտոնը: Հանրապետության պալատում կայացած պաշտոնակալման արարողության ժամանակ Լուկաշենկոն, աջ ձեռքը դնելով Սահմանադրության հատուկ օրինակի վրա, հավատարմության երդում Է տվել բելառուս ժողովրդին: Երդմնատվության մասին ակտի ստորագրումից հետո Կենտրոնական ընտրական հանձնաժողովի նախագահ Լիդիա Երմոշինան Լուկաշենկոյին Է հանձնել հատուկ վկայական, որում հավաստվում Է նրա՝ Բելառուսի նախագահ ընտրվելու փաստը:
Պաշտոնակալման հանդիսավոր արարողությանը ներկա են եղել Բելառուսի պատգամավորներ, կառավարության եւ ԿԸՀ-ի անդամներ, Սահմանադրական, Գերագույն դատարանների դատավորներ, բելառուս հասարակայնության, ստեղծագործական մտավորականության ներկայացուցիչներ, Բելառուսում հավատարմագրված մի շարք առաքելությունների ներկայացուցչություններ: Մինչդեռ Եվրամիության պետությունների բոլոր դեսպանները Լուկաշենկոյի պաշտոնակալման արարողության օրը լքել են Մինսկը:
Ինչպես այսօր հայտարարել Է Եվրամիության արտաքին գործերի եւ անվտանգության քաղաքականության հարցերով գերագույն ներկայացուցիչ Քեթրին Էշթոնի մամուլի քարտուղարը, նրանք բոլորը գնացել են Լիտվա՝ մասնակցելու դիվանագիտական անձնակազմի հանդիպմանը, ինչից հետո կվերադառնան Բելառուսի մայրաքաղաք: Միջազգային փորձագետները չեն կասկածում, որ այդ հանդիպումը կազմակերպված Է միակ նպատակով՝ պատրվակ ստեղծել Լուկաշենկոյի պաշտոնակալման արարողությանը չմասնակցելու համար: