2 րոպեի ընթերցում
Ուկրաինայի արտգործնախարար Անդրեյ Սիբիհան շնորհակալություն է հայտնել ԵՄ խորհրդում Կիպրոսի նախագահությանը՝ Եվրամիությանն Ուկրաինայի անդամակցության գործընթացն առաջ տանելու համար, նաև կարևորել է Հունգարիայի դերն այդ հարցում: «Արմենպրես»-ի փոխանցմամբ՝ այս մասին նա գրել է X սոցիալական հարթակում:
Դիվանագետը նաև երախտագիտություն է հայտնել «ԵՄ բոլոր անդամ պետություններին, Եվրոպական հանձնաժողովին և ԵՄ կառույցներին իրենց անսասան աջակցության համար»։
Սիբիհան նաև շեշտել է այս գործընթացում Հունգարիայի ներգրավվածության կարևորությունը:
«Ես նաև գնահատում եմ Հունգարիայի կառուցողական ներգրավվածությունը։ Մենք նոր էջ ենք բացում Ուկրաինա-Հունգարիա հարաբերություններում՝ կառուցված փոխադարձ հարգանքի, վստահության և մեր համատեղ եվրոպական ապագայի վրա», - հավելել է նա:
Հունիսի 4-ին ավելի վաղ Ուկրաինայի վարչապետը հայտարարել էր, որ Եվրամիության անդամ բոլոր երկրները համաձայնել են Ուկրաինայի և Մոլդովայի հետ սկսել անդամակցության բանակցությունների առաջին փաթեթի քննարկումները։
Մինչ այդ Հունգարիայի վարչապետ Պետեր Մադյարը հայտարարել էր, որ Կիևը և Բուդապեշտը համաձայնության են եկել Ուկրաինայում բնակվող մոտ 100 000-անոց հունգարական փոքրամասնության իրավունքների հարցում։ Մադյարը նախկինում ասել էր, որ այս երկարատև վեճի լուծումն անհրաժեշտ պայման է, որպեսզի Բուդապեշտը համաձայնի Ուկրաինայի անդամակցությանը ԵՄ-ին։