Շիրակի մարզում 2026 թվականի համար հաստատվել է 12 սուբվենցիոն ծրագիր՝ 80 ենթածրագրով՝ 5,95 մլրդ դրամ ընդհանուր արժեքով
3 րոպեի ընթերցում
ՀՀ Շիրակի մարզի համայնքների կողմից ներկայացված սուբվենցիոն հայտերի գնահատման միջգերատեսչական հանձնաժողովի կողմից հաստատվել է 12 սուբվենցիոն ծրագիր՝ 80 ենթածրագրով: Ինչպես «Արմենպրես»-ին տեղեկացրին Շիրակի մարզպետի աշխատակազմից, ծրագրերի ընդհանուր արժեքը կազմում է 5,95 մլրդ դրամ, որից Կառավարության համամասնությունը 2,67 մլրդ դրամ է։
Գյումրի համայնքում կիրականացվի 21 փողոցի հիմնանորոգման խոշոր ծրագիր, որի ընդհանուր արժեքը կազմում է 3,06 մլրդ դրամ, իսկ Կառավարության մասնաբաժինը՝ 1,22 մլրդ դրամ:
Արթիկ համայնքում նախատեսվում է կառուցել Սպանդարյան, Սարալանջ, Գետափ, Լուսակերտ, Գեղանիստ և Մեղրաշեն բնակավայրերի ոռոգման համակարգերը: Ծրագրի արժեքը 486,6 մլն դրամ է, որից պետության աջակցությունը կազմում է 316,3 մլն դրամ։
Անի համայնքում կիրականացվի Ձիթհանքով, Լանջիկ, Սառնաղբյուր բնակավայրերի ներբնակավայրային փողոցների և դեպի Սառնաղբյուր ու Շիրակավան բնակավայրեր տանող ճանապարհների ասֆալտապատում: Այս ծրագրի բյուջեն 1,1 մլրդ դրամ է, իսկ Կառավարության համամասնությունը՝ 440,9 մլն դրամ։
Աշոցք համայնքում հաստատվել է չորս սուբվենցիոն ծրագիր: Աշոցք բնակավայրի երեք բազմաբնակարան շենքերի բակերի բարեկարգման համար կծախսվի 109,7 մլն դրամ: Աշոցք, Թորոսգյուղ, Վարդաղբյուր և Կարմրավան բնակավայրերի փողոցների ասֆալտապատման աշխատանքների արժեքը կազմում է 278,9 մլն դրամ, որից պետական աջակցությունը 125,5 մլն դրամ է: Թավշուտ, Մեծ Սեպասար, Փոքր Սեպասար, Զույգաղբյուր, Արփենի և Սալուտ բնակավայրերի փողոցները կսալարկվեն տուֆ քարով, ինչի համար կհատկացվի 231 մլն դրամ, որից 150 մլն դրամը կտրամադրի Կառավարությունը: Բացի այդ, համայնքի 17 բնակավայրերում կկառուցվի արտաքին լուսավորության համակարգ՝ 172,7 մլն դրամ ընդհանուր արժեքով, որից Կառավարության համամասնությունը 95 մլն դրամ է։
Ամասիա համայնքում ևս նախատեսվում են մի շարք ենթակառուցվածքային ծրագրեր: Ամասիա բնակավայրի 19-րդ փողոցի և Գտաշեն-Կամխուտ ճանապարհի 350 մետր հատվածի ասֆալտապատման ծրագրի արժեքը կազմում է 173,8 մլն դրամ, որից Կառավարության մասնաբաժինը 86,9 մլն դրամ է։ Բնակավայրերում կկառուցվի փողոցային լուսավորության ցանց՝ 106 մլն դրամով, որից պետության մասնաբաժինը 58,3 մլն դրամ է: Գազաֆիկացման աշխատանքներ կիրականացվեն Գտաշեն բնակավայրում, ինչպես նաև Հովտուն և Արեգնադեմ բնակավայրերու: Խմելու ջրի ներքին ցանցի կառուցում և ջրաղբյուրի հիմնանորոգում կիրականացվի Արդենիս, Գառնառիճ և Հովտուն բնակավայրերում, ինչի ընդհանուր արժեքը կազմում է 65,5 մլն դրամ, որից պետության համամասնությունը 40,4 մլն դրամ է։