2 րոպեի ընթերցում
Դուշանբեում ԱՊՀ միջխորհրդարանական վեհաժողովի (ՄԽՎ) խորհրդի նիստի մասնակիցները ծաղկեպսակ են դրել տաջիկական առաջին պետության հիմնադիր Իսմայիլ Սոմոնիի հուշարձանի պատվանդանին՝ հարգանքի տուրք մատուցելով Տաջիկստանի ժողովրդի բարձր ազգային և պատմական արժեքներին։ «Արմենպրես»-ի փոխանցմամբ՝ այս մասին հաղորդում է ԱՊՀ երկրների միջխորհրդարանական վեհաժողովի մամուլի ծառայությունը։
Արարողությանը մասնակցել են ԱՊՀ երկրների խորհրդարանների ղեկավարներ, խորհրդարանների նախագահների տեղակալներ։
Հայաստանի կողմից միջոցառմանը մասնակցել է Ազգային ժողովի նախագահի տեղակալ Ռուբեն Ռուբինյանը։
Տաջիկական առաջին պետության հիմնադիր Իսմայիլ Սոմոնիի հուշարձանը բացվել է 1999 թվականին՝ Սոմոնիների պետության 1100-ամյակի առթիվ։ Այն Դուշանբեի հիմնական տեսարժան վայրերից մեկն է և գլխավոր խորհրդանիշը։ Տաջիկստանի մայրաքաղաքի կենտրոնում՝ Դուստի հրապարակում գտնվող հուշարձանը 13 մետր բարձրությամբ քանդակ է, որի կամարի բարձրությունը 40 մետր է։ Քանդակը ստեղծվել է ռուս քանդակագործ Լև Կերբելի կողմից։
ԱՊՀ միջխորհրդարանական վեհաժողովի խորհրդի, լիագումար նիստերի և մշտական հանձնաժողովների աշխատանքներին մասնակցելու համար Տաջիկստան են գործուղվել Ազգային ժողովի նախագահի տեղակալ Ռուբեն Ռուբինյանը, Ազգային ժողովի պետական-իրավական հարցերի մշտական հանձնաժողովի նախագահ Վլադիմիր Վարդանյանը, Ազգային ժողովի պատգամավորներ Ալեքսեյ Սանդիկովը, Շիրակ Թորոսյանը, Գեղամ Նազարյանը։