Խորհրդարանական ընտրություններ 2026

ՀՀ Ներքին գործերի նախարարության Միգրացիայի և քաղաքացիության ծառայության պետ Նելլի Դավթյանը հերքեց հրապարակումներն այն մասին, թե Երևան քաղաքի Էրեբունի վարչական շրջանի Սուվորովի փողոցի տուն 82 հասցեում Թուրքիայի Հանրապետության որևէ քաղաքացի է հաշվառված։

Հասցեի սեփականատեր ներկայացող անձը հայտարարել էր, որ իր տանը հաշվառված Նանոր Յարությունի Քրտան Օղլի անուն-ազգանունով անձը Թուրքիայի քաղաքացի է։

Հայաստանի Հանրապետությունում տնային կալանքի տակ գտնվող 922 անձից 869-ն ունեն ընտրելու իրավունք։

«Արմենպրես»-ի փոխանցմամբ՝ այս մասին հայտնում են ՀՀ արդարադատության նախարարությունից, նշելով, որ ժամը 12:30-ի դրությամբ ընտրությանը մասնակցելու ցանկություն է հայտնել 434 անձ, որոնցից արդեն քվեարկել է 205-ը։

Հայաստանում խորհրդարանական ընտրություններին մասնակցող «Բարգավաճ Հայաստան» կուսակցության ցուցակը գլխավորող Գագիկ Ծառուկյանը հայտարարել է, որ քաղաքացիները փոփոխությունների ակնկալիքով ակտիվորեն մասնակցում են քվեարկությանը։ «Արմենպրես»-ի հաղորդմամբ՝ քվեարկելուց հետո լրագրողների հետ զրույցում Ծառուկյանը նշել է, որ վաղ առավոտից ընտրատեղամասերում նկատվող ակտիվությունը վկայում է հասարակության տրամադրությունների մասին։

Հայաստանի Հանրապետության քննչական կոմիտեում ՀՀ ՆԳՆ-ից ստացված առերևույթ հանցանքի մասին հաղորդման համաձայն՝ 2026 թվականի հունիսի 7-ին ժամը 08:19-ին թիվ 20/56 ընտրատեղամասում «Ուժեղ Հայաստան»-ի վստահված անձ Ա.Ս.-ն կատարել է կրկնակի քվեարկության փորձ, որից հետո սարքը «կրկնակի քվեարկության փորձ» գրառմամբ կտրոն է տպել: «Արմենպրես»-ի փոխանցմամբ՝ այս մասին հայտնում են Քննչական կոմիտեից՝ նշելով, որ Ա․Ա․-ն ձերբակալվել է։

«Ընտրատեղամասի հանձնաժողովի կողմից կտրոնը վերցվել է ԿԸՀ ներկայացնելու համար, որից հետո Ա.Ս.-ն դուրս է հրավիրվել ընտրատարածքից և ներկայացվել է ոստիկանության ծառայողին:

Հայաստանի Հանրապետության պաշտպանության նախարար Սուրեն Պապիկյանը խորհրդարանական ընտրություններին իր քվեն տվել է հանուն վերջնական, հարատև խաղաղության, ինչպես նաև հանուն նրա, որ հայ զինվորները ծառայեն խաղաղ Հայաստանում։ 

«Արմենպրես»-ի հաղորդմամբ՝ այս մասին Սուրեն Պապիկյանը նշել է հունիսի 7-ի խորհրդարանական ընտրություններին քվեարկելուց հետո լրագրողների հետ ճեպազրույցում։

Հայաստանի ներքին գործերի նախարարության օպերատիվ կառավարման կենտրոնի 112 հեռախոսահամարին և 87-67 թեժ գծին հունիսի 7-ին ժամը 11։00-ի դրությամբ ստացվել է 17 ահազանգ։

«Արմենպրես»-ի փոխանցմամբ՝ այս մասին հայտնում են ՆԳ նախարարությունից՝ տեղեկացնելով, որ արձանագրվել է կրկնաքվեարկության 2 դեպք, որոնցով կազմված փաստաթղթերը ներկայացվել են նախաքննական մարմին։ Ենթադրյալ իրավախախտումների վերաբերյալ ստացված 53 տեղեկությունները ստուգման փուլում են։

Հայաստանի Հանրապետության Ազգային ժողովի ընտրություններում առավոտյան ժամը 08:00-11.00-ն ընտրական իրավունք ունեցող 2 միլիոն 505 հազար 102 քաղաքացիներից քվեարկությանը մասնակցել է 362 հազար 657-ը կամ ընտրական իրավունք ունեցող քաղաքացիների 14.48 տոկոսը:

«Արմենպրես»-ի փոխանցմամբ՝ այս մասին հայտնեց ԿԸՀ անդամ Աննա Գրիգորյանը՝ նշելով, որ Կենտրոնական ընտրական հանձնաժողովն ունի պարտավորություն յուրաքանչյուր երեք ժամը մեկ հավաքագրելու, ամփոփելու և ներկայացնելու տվյալ պահի դրությամբ քվեարկությանը մասնակցած քաղաքացիների տվյալները։ Քանի որ այդ ամբողջ գործընթացը կարող է բավականին ժամանակատար լինել, ներկայացնում են տեղեկատվությունը՝ այն ամփոփելուց հետո։

ՀՀ ազգային ժողովի նախագահ Ալեն Սիմոնյանը կատարեց իր քաղաքացիական պարտքը՝ հունիսի 7-ին մասնակցելով Հայաստանի խորհրդարանական ընտրություններին։

Հայաստանի շնորհապետական կուսակցության վարչապետի թեկնածու Գուրգեն Սիմոնյանը հայտարարել է, որ քաղաքական ուժը պատրաստ է ընտրությունների ցանկացած արդյունքի, սակայն ակնկալիքները դրական են, և հնարավոր է լուրջ հաջողություն արձանագրել։ «Արմենպրես»-ի հաղորդմամբ՝ քվեարկությունից հետո լրագրողների հետ ճեպազրույցում Սիմոնյանը նշել է, որ կուսակցությունը ստեղծված չէ կարճաժամկետ քաղաքական նպատակների համար։

«Ինչպես միշտ, մենք կրկնում ենք հետևյալը, որ 3 սցենարին էլ մենք պատրաստ ենք, բայց ակնկալիքները բավականին դրական են։ Ես կարծում եմ, որ շատ մեծ հնարավորություն կա լուրջ հաջողություն արձանագրելու, որը կլինի նաև Հայաստանի հաջողությունը և հայ ժողովրդի հաջողությունը»,-ասել է նա։

ՀՀ երկրորդ նախագահ, «Հայաստան» դաշինքի ընտրացուցակը գլխավորող թեկնածու Ռոբերտ Քոչարյանն Ազգային ժողովի ընտրություններին քվեարկել է հանուն պաշտպանված, անվտանգ, բարեկեցիկ ու ազգային ինքնությամբ Հայաստանի։

«Արմենպրես»-ի հաղորդմամբ՝ այս մասին Ռոբերտ Քոչարյանն ասել է հունիսի 7-ի խորհրդարանական ընտրություններին քվեարկելուց հետո լրագրողների հետ ճեպազրույցի ընթացքում։

Հայաստանի անվտանգության խորհրդի քարտուղար Արմեն Գրիգորյանը հունիսի 7-ին՝ Հայաստանի Հանրապետության Ազգային ժողովի ընտրություններին, կնոջ և երեխաների հետ քվեարկեց Երևանի Ալեքսանդր Շիրվանզադեի անվան թիվ 21 հիմնական դպրոցում տեղակայված 4/41 ընտրատեղամասում։

Գյումրիում ընտրություններին մասնակցության ակտիվություն է նկատվում: Ժամը 12:00-ի դրությամբ թիվ 32 ԸԸՀ-ում (ընտրատարածքային ընտրական հանձնաժողով) արձանագրվել է 11,6 տոկոս մասնակցություն: Ավելի քան 47 հազար ընտրող ունեցող թիվ 32 ԸԸՀ-ն համակարգում է Գյումրիի 24 և Ախուրյան համայնքի 20 բնակավայրերի ընտրական տեղամասերը:

Խորհրդարանական ընտրություններին մասնակցող «Ուժեղ Հայաստան» դաշինքի առաջնորդ Սամվել Կարապետյանի կարծիքով՝ Ռուսաստանն ունի իր շահերը Հայաստանում և հետևողական վարում է իր քաղաքականությունը։ «Արմենպրես»-ի փոխանցմամբ՝ Սամվել Կարապետյանը նման հայտարարություն արեց Երևանի 3/27 ընտրատեղամասում քվեարկելուց հետո լրագրողների հետ ճեպազրույցի ընթացքում։

«Միասնության թևեր» կուսակցության վարչապետի թեկնածու Արման Թաթոյանը քվեարկել է 7/50 ընտրատեղամասում և հայտարարել է, որ Ազգային ժողովի այս ընտրությունները պատմական նշանակություն ունեն։

«Այս ընտրություններն իսկապես պատմական նշանակության են։ Մենք որոշում ենք այսօր մեր ապագան։ Մենք որոշում ենք մեր երեխաների համար, թե ինչ երկիր ենք ունենալու»,-«Արմենպրես»-ի հաղորդմամբ՝ լրագրողների հետ ճեպազրույցում ասել է Թաթոյանը։

Հայաստանում խորհրդարանական ընտրությունների ընթացքում ուղիղ հեռարձակում է իրականացվում 300-ից ավելի ընտրող ունեցող 1774 ընտրական տեղամասերից։ Տեխնիկական սարքավորումները և տեսահսկման համակարգերը գործում են անխափան՝ նպաստելով ընտրական գործընթացների թափանցիկությանն ու հանրային վստահության բարձրացմանը։

«Արմենպրես»-ի փոխանցմամբ՝ այս մասին հայտնեց ՀՀ կենտրոնական ընտրական հանձնաժողովի նախագահի տեղակալ Նունե Հովհաննիսյանը՝ ներկայացնելով ընտրական տեղամասերից քվեարկության ընթացքի և արդյունքների տեսանկարահանման գործընթացը: