Խորհրդարանական ընտրություններ 2026

«Միասնության թևեր» կուսակցության վարչապետի թեկնածու Արման Թաթոյանը քվեարկել է 7/50 ընտրատեղամասում և հայտարարել է, որ Ազգային ժողովի այս ընտրությունները պատմական նշանակություն ունեն։

«Այս ընտրություններն իսկապես պատմական նշանակության են։ Մենք որոշում ենք այսօր մեր ապագան։ Մենք որոշում ենք մեր երեխաների համար, թե ինչ երկիր ենք ունենալու»,-«Արմենպրես»-ի հաղորդմամբ՝ լրագրողների հետ ճեպազրույցում ասել է Թաթոյանը։

Հայաստանում խորհրդարանական ընտրությունների ընթացքում ուղիղ հեռարձակում է իրականացվում 300-ից ավելի ընտրող ունեցող 1774 ընտրական տեղամասերից։ Տեխնիկական սարքավորումները և տեսահսկման համակարգերը գործում են անխափան՝ նպաստելով ընտրական գործընթացների թափանցիկությանն ու հանրային վստահության բարձրացմանը։

«Արմենպրես»-ի փոխանցմամբ՝ այս մասին հայտնեց ՀՀ կենտրոնական ընտրական հանձնաժողովի նախագահի տեղակալ Նունե Հովհաննիսյանը՝ ներկայացնելով ընտրական տեղամասերից քվեարկության ընթացքի և արդյունքների տեսանկարահանման գործընթացը:

ՀՀ վարչապետ, «Քաղաքացիական պայմանագիր» կուսակցության վարչության նախագահ Նիկոլ Փաշինյանը վստահ է, որ Հայաստանում խորհրդարանական ընտրությունների արդյունքում հաղթելու են Հայաստանի քաղաքացիները, իսկ ժողովրդավարության ամրապնդումը նպաստելու է տարածաշրջանային խաղաղությանն ու համագործակցությանը։ «Արմենպրես»-ի հաղորդմամբ՝ քվեարկելուց հետո հայ և օտարերկրացի լրագրողների հետ ճեպազրույցում Փաշինյանը նշել է, որ ընտրությունների վերաբերյալ իր հիմնական ակնկալիքը կապված է քաղաքացիների կամարտահայտության հետ։

Ընտրական հանձնաժողովի 2 նախագահ և մեկ քարտուղար ձերբակալվել են։ «Արմենպրես»-ի փոխանցմամբ՝ այս մասին հայտնեց Հայաստանի Հանրապետության կենտրոնական ընտրական հանձնաժողովի նախագահ Վահագն Հովակիմյանը՝ ներկայացնելով ընտրատեղամասերում մեկնարկած աշխատանքները։

«Բոլոր ընտրատեղամասերն իրենց աշխատանքները սկսել են առավոտյան ժամը 07։00-ից, առավոտյան 8։00-ից բոլոր ընտրատեղամասերը սկսել են ընդունել ընտրող քաղաքացիներին։ Ժամը 08։00-ի դրությամբ 2005 տեղամասերից 48-ում հանձնաժողովի անդամներ են բացակայել։ Ընդհանուր 50 բացականերից 3-ը հանձնաժողովների երկու նախագահներ ու մեկ քարտուղար են, որոնց չներկայանալու պատճառը քրեաիրավական գործընթացներն են։ Սակայն ասեմ, որ Ընտրական օրենսգիրքը հնարավորություն է տալիս գործընթացը շարունակել, եթե նույնիսկ ընտրական հանձնաժողովի անդամներից որևէ մեկը բացակայում է։ Անհրաժեշտության դեպքում ընտրատարածքային ընտրական հանձնաժողովի նախագահները նոր անդամ են նշանակում»,- նշեց նա։

ՀՀ հակակոռուպցիոն կոմիտեի և ՀՀ ազգային անվտանգության ծառայողների կողմից իրականացրած միջոցառումների հիման վրա Հակակոռուպցիոն կոմիտեում նախաձեռնված քրեական վարույթով փաստական տվյալներ են ստացվել «Ուժեղ Հայաստան» կուսակցությունների դաշինքի պատգամավորի թեկնածուի կողմից Ազգային ժողովի ընտրություններին հիշյալ դաշինքի օգտին քվեարկելու պայմանով Լոռու մարզի մի շարք բնակիչների ընտրակաշառք տալու դեպքերի մասին։

«Արմենպրես»-ի փոխանցմամբ՝ դեպքի առթիվ ՀՀ հակակոռուպցիոն կոմիտեում նախաձեռնված քրեական վարույթով ձերբակալվել են մի շարք անձինք, կատարվել են խուզարկություններ և վարութային այլ գործողություններ։

Հայաստանի Հանրապետության Ազգային ժողովի ընտրություններում քվեարկող քաղաքացիները պարտավոր են ստանալ բոլոր քվեաթերթիկները, իսկ ծրարի կամ քվեաթերթիկի վրա որևէ գրառում կատարելու դեպքում քվեն կհամարվի անվավեր։ «Արմենպրես»-ի հաղորդմամբ՝ մամուլի ասուլիսի ժամանակ այս մասին հայտարարել է Կենտրոնական ընտրական հանձնաժողովի քարտուղար Արմեն Սմբատյանը։

«Ուժեղ Հայաստան» դաշինքի ընտրական ցուցակը գլխավորող Նարեկ Կարապետյանը ՀՀ Ազգային ժողովի հունիսի 7-ի ընտրություններին քվեարկել է Տաշիրում։

«Արմենպրես»-ի հաղորդմամբ՝ քվեարկությունից հետո լրագրողների հետ ճեպազրույցում Նարեկ Կարապետյանը նշել է, որ քվեարկել է հանուն մեծ փոփոխության և վերակառուցվող Հայաստանի։

Հայաստանում մեկնարկել է խորհրդարանական ընտրությունների քվեարկությունը։

«Արմենպրես»-ի փոխանցմամբ՝ քվեարկությունը մեկնարկել է ժամը 08։00-ից և կշարունակվի մինչև 20։00-ն, որին կհաջորդի ձայների հաշվարկը։