Հակոբ Արշակյանը Նիկոլ Փաշինյանին վստահեցրեց, որ միջպետական ճանապարհների սպասարկումը ձմռանը կիրականացվի պատշաճ
1 րոպեի ընթերցում
ԵՐԵՎԱՆ, 20 ԴԵԿՏԵՄԲԵՐԻ, ԱՐՄԵՆՊՐԵՍ: Տրանսպորտի, կապի և տեղեկատվական տեխնոլոգիաների նախարարի պաշտոնակատար Հակոբ Արշակյանը վստահեցնում է, որ միջպետական ճանապարհների սպասարկումը ողջ ձմռան ընթացքում պատշաճ կիրականացվի:
Կառավարության նիստում վարչապետի պաշտոնակատար Նիկոլ Փաշինյանը հետաքրքրվեց՝ արդյոք նախարարությունը պատրաստ է սպասվող առատ տեղումներին:
«Միջպետական ճանապարհների սպասարկմանը պատրաստ ենք, այդ թվում՝ տեխնիկայի առումով: Որոշ հատվածներում բանակցությունների մեջ ենք, քանի որ որոշ խնդիրներ կան սպասարկողների հետ կապված: Որոշ տեղերում ձյունն արդեն տեղացել է և պատվով տակից դուրս ենք եկել ու այդպես էլ կշարունակենք»,- «Արմենպրես»-ի փոխանցմամբ, ասաց նախարարի պաշտոնակատարը:
Միաժամանակ, նա նշեց, որ նախանշված են բոլոր վտանգավոր կետերը, որտեղ համագործակցում են արտակարգ իրավիճակների նախարարության հետ: