Շրջանավարտների իրական հնարավորությունները չեն բացահայտվում. Արայիկ Հարությունյանը դեմ է ներկայիս շտեմարաններին
1 րոպեի ընթերցում
ԵՐԵՎԱՆ, 12 ՀՈՒՆԻՍԻ, ԱՐՄԵՆՊՐԵՍ: Այսօրվա շտեմարանները թույլ չեն տալիս բացահայտել դիմորդների իրական հնարավորությունները և տեսնել նրանց քննադատական ու վերլուծական միտքը:
«Արմենպրես»-ի հաղորդմամբ՝ լրագրողների հետ զրույցում այս մասին ասաց ՀՀ կրթության և գիտության նախարար Արայիկ Հարությունյանը:
«Շտեմարաններն ու գիտելիք ստուգելու այն ձևերը, որ այսօր գոյություն ունեն, թույլ չեն տալիս բացահայտել աշակերտների իրական հնարավորությունները: Գուցե գիտելիքների ստուգման այս ձևը զգալի նվազեցնում է կոռուպցիան, բայց, միևնույն ժամանակ, թույլ չի տալիս վեր հանել աշակերտների քննադատական միտքը: Այս տարի փոփոխություններ չէինք կարող անել, որովհետև ընդամենը մի քանի շաբաթ էր մնացել մինչև քննությունների մեկնարկը»,- ընդգծեց նախարարը:
Նա վստահեցրեց, որ հաջորդ տարի միասնական քննություններում որոշ փոփոխություններ անելու ուղղությամբ աշխատանքներ կտարվեն: