Ռեֆորմիստների կուսակցությունը քարոզարշավ է անցկացրել Երևանի Կենտրոն և Արաբկիր վարչական շրջաններում

Ռեֆորմիստների կուսակցությունը նախընտրական քարոզարշավի շրջանակում հանդիպումներ և քարոզչական ակցիաներ է անցկացրել Կենտրոն վարչական շրջանում և Արաբկիր վարչական շրջանում։ «Արմենպրես»-ի հաղորդմամբ՝ կուսակցության ներկայացուցիչները ներկայացրել են իրենց քաղաքական առաջնահերթություններն ու նախընտրական ծրագրի հիմնական դրույթները։

Քարոզարշավից առաջ կուսակցության ներկայացուցիչները՝ վարչապետի թեկնածու Վաղարշակ Հարությունյանի գլխավորությամբ, այցելել են Հաղթանակի զբոսայգի՝ հարգանքի տուրք մատուցելու նահատակների հիշատակին։

Լրագրողների հետ ճեպազրույցում Հարությունյանն անդրադարձել է Երկրորդ համաշխարհային պատերազմի, Խորհրդային Միության և տարածաշրջանային անվտանգության հարցերին։

«Մենք պիտի գնահատական տանք, թե ինչ է տեղի ունեցել, որպեսզի մեր սերունդը պատկերացնի, թե ինչ է եղել Խորհրդային Միությունը։ Երբ մենք մտել ենք Խորհրդային Միություն, Հայաստանում եղել է մոտ 800 հազար հայ, իսկ 1991 թվականին բնակչությունը հասել էր 3 միլիոն 600 հազարի»,- նշել է նա։

Նրա խոսքով՝ բնակչության աճը վկայում է այն մասին, թե ինչ պայմաններում է ապրել ժողովուրդը։

Հարությունյանը նշել է նաև, որ Երկրորդ համաշխարհային պատերազմի ժամանակ Ստալինգրադի անկման դեպքում թուրքական բանակը կարող էր ներխուժել Հարավային Կովկաս։

«Թուրքիան տարածաշրջանը շարունակում է դիտարկել որպես իր ազդեցության գոտի»,- հավելել է Հարությունյանը։

Ռեֆորմիստների կուսակցությունը ընտրություններին մասնակցում է «Անվտանգություն և զարգացում» կարգախոսով։

Մայիսի 8-ին մեկնարկել է Հայաստանում հունիսի 7-ին կայանալիք խորհրդարանական ընտրությունների նախընտրական քարոզարշավը, որը կշարունակվի մինչև հունիսի 5-ը։ Ընտրություններին մասնակցելու համար գրանցվել է 19 քաղաքական ուժ՝ 2 դաշինք և 17 կուսակցություն։

Ռեֆորմիստների կուսակցությունը խորհրդարանական ընտրություններին մասնակցում է 1 համարի ներքո։

Կուսակցությունը ԿԸՀ էր ներկայացրել 83 թեկնածուից բաղկացած ցուցակ։ Կուսակցության նախագահն է Վահան Բաբայանը, իսկ վարչապետի թեկնածուն՝ Վաղարշակ Հարությունյանը։

Կուսակցության նախընտրական ծրագրի հիմնական դրույթներից են ազգային անվտանգության նոր հայեցակարգի ընդունումը, բարձրագույն կրթության և առողջապահության անվճար դարձնելը, ուսուցիչների և բժիշկների աշխատավարձերի բարձրացումը, ինչպես նաև Հայաստանը տարածաշրջանային կրիպտո-հաբ դարձնելու նախաձեռնությունը։