Վահագն Արսենյանը հրաժարվել է Հայաստանում ձևավորվելիք խորհրդարանում պատգամավորի իր մանդատից

Վայոց ձորի մարզպետ Վահագն Արսենյանը հայտնել է, որ հրաժարվել է Հայաստանում հունիսի 7-ին կայացած խորհրդարանական ընտրությունների արդյունքներով ձևավորվելիք խորհրդարանում պատգամավորի իր մանդատից և շարունակելու է պաշտոնավարումը՝ որպես Վայոց ձորի մարզպետ։

«Արմենպրես»-ի փոխանցմամբ՝ Վահագն Արսենյանն այդ մասին գրել է «Ֆեյսբուք»-ի իր էջում։

«Հարգելի՛ վայոցձորցիներ, տեղեկացնում եմ, որ հրաժարվել եմ Հայաստանի Հանրապետության Ազգային ժողովի պատգամավորի մանդատից և շարունակելու եմ իմ գործունեությունը՝ որպես Վայոց ձորի մարզպետ։

Նախընտրական քարոզարշավի ընթացքում բազմիցս նշել եմ, որ շարունակելու եմ իմ աշխատանքը հանուն Վայոց ձորի և նրա բնակիչների։ Այսօր ևս հավատարիմ եմ այդ խոստմանը՝ շարունակելով ստանձնած պատասխանատվությունը։

Իմ առաջնահերթությունը մնում է մարզի առջև ծառացած խնդիրների լուծումը և նոր ծրագրերի իրականացումը՝ ի նպաստ Վայոց ձորի զարգացման ու ապագայի։

Առջևում բազմաթիվ կարևոր ծրագրեր և նախաձեռնություններ են, որոնք միասին պետք է կյանքի կոչենք։ Վստահ եմ, որ համատեղ աշխատանքի, փոխվստահության և հետևողական ջանքերի շնորհիվ կշարունակենք մարզի զարգացման ուղին՝ ստեղծելով նոր հնարավորություններ և ապահովելով Վայոց ձորի հետագա առաջընթացը»,- գրել է Արսենյանը։

Հայաստանում հունիսի 7-ին կայացած խորհրդարանական ընտրությունների արդյունքներով խորհրդարան են անցել երեք քաղաքական ուժ՝ իշխող «Քաղաքացիական պայմանագիր» կուսակցությունը, «Ուժեղ Հայաստան» դաշինքը և «Հայաստան» դաշինքը։ ՔՊ-ն նոր խորհրդարանում կունենա 64 մանդատ, «Ուժեղ Հայաստան»-ը՝ 29 մանդատ, «Հայաստան»-ը՝ 12 մանդատ։

Վահագն Արսենյանը «Քաղաքացիական պայմանագիր» կուսակցության ընտրական ցուցակի 77-րդ համարն էր։ Արսենյանը 2025 թվականի հոկտեմբերից զբաղեցնում է Վայոց ձորի մարզպետի պաշտոնը։