2 րոպեի ընթերցում
Ալբերտ Ազարյանի անվան մարմնամարզության նոր մարզադպրոցի շինարարական աշխատանքները լայն թափով ընթանում են. Երևանի քաղաքապետի առաջին տեղակալ Արմեն Փամբուխչյանն իրականցվող աշխատանքները գոհացուցիչ է համարում:
«Արմենպրես»-ի փոխանցմամբ՝ այս մասին քաղաքապետի առաջին տեղակալն ասաց Երևանի քաղաքապետարանի գործակարգավարական խորհրդակցություն ընթացքում՝ նշելով, որ ըստ որոշ գնահատականների՝ շինարարական աշխատանքներն ավելի քան մեկ ամսով գրաֆիկից առաջ են ընկել:
«Այս տեմպը պետք է պահպանել: Ինչպես բազմիցս ասել ենք, այս մարզադպրոցի շինարարությունը մեծ կարևորություն ունի, և թե՛ քաղաքապետարանը, թե՛ շինարարները և մնացած բոլոր կողմերը, որոնք ունեն որոշակի գործառույթ, պետք է պատշաճ կերպով իրականացնեն աշխատանքները: Վերահսկողությունը պետք է լինի 24 ժամյա՝ հաշվի առնելով, որ ժամկետները բավականին սուղ են»,- նշեց Փամբուխչյանը:
Երևանի կառուցապատման և ներդրումային ծրագրերի իրականացման գրասենյակի տնօրեն Անետա Բաբայանը ևս հավելեց, որ շինարարական աշխատանքները ընթանում են սահուն կերպով:
«Եթե 2025 թվականի հատկացված բյուջեի շրջանակում նայենք, նշեմ, որ օգոստոսին արդեն մեկնարկած են եղել շինարարական աշխատանքները, և այս պահին արդեն 32 տոկոսից ավել կատարողական ունենք:
Մասնաշենքերից որոշներում արդեն մեկնարկել են հիմնային աշխատանքները, որոշներում երկաթբետոնե կոնստրուկցիաների և պատերը շարելու հետ կապված աշխատանքները, իսկ որոշներում էլ արդեն հողային աշխատանքներն ավարտին են մոտենում»,- նշեց Բաբայանը:
Մարզադպրոցի շինարարությունը նախատեսվում է ավարտին հասցնել 2026 թվականի վերջին։ Նախատեսվում է, որ նոր համալիրը կհյուրընկալի 2027թ. Հայաստանում առաջին անգամ անցկացվելիք Մարմնամարզության Եվրոպայի առաջնությունը՝ լիարժեք ենթակառուցվածքային պատրաստվածությամբ։