Ազգային ժողովի Հայաստան-Ֆինլանդիա, Նորվեգիա բարեկամական խմբի անդամները հանդիպել են ՀՀ-ում Ֆինլանդիայի դեսպանին
1 րոպեի ընթերցում

Ազգային ժողովի Հայաստան-Ֆինլանդիա, Նորվեգիա բարեկամական խմբի ղեկավար Լիլիթ Գալստյանը, անդամներ Քնարիկ Հարությունյանը և Գարիկ Սարգսյանը խորհրդարանում հանդիպել են Հայաստանում Ֆինլանդիայի արտակարգ և լիազոր դեսպան Կիրստի Նարինենի հետ։
Ինչպես «Արմենպրես»-ին տեղեկացրին Ազգային ժողովի աշխատակազմի հասարակայնության հետ կապերի և հաղորդակցության վարչությունից, Լիլիթ Գալստյանը հանդիպման ժամանակ խոսել է Հայաստանի ու Ֆինլանդիայի միջև հարաբերությունների աշխուժացման ու միջխորհրդարանական գործակցության զարգացման կարևորությունից` այդ հարցում ընդգծելով բարեկամական խմբերի դերակատարությունը։ Բարեկամական խմբի ղեկավարը նաև ընդգծել է մի շարք ոլորտներում փոխգործակցության զարգացման զգալի ներուժի առկայությունն ու այդ ուղղությամբ անհրաժեշտ քայլերի ձեռնարկումը։
Կիրստի Նարինենը, կարևորելով նմանատիպ հանդիպումները, համակարծիք է եղել, որ մի շարք ոլորտներում կա չօգտագործված ներուժ։
Անդրադարձ է եղել նաև Հայաստան-Եվրոպական միություն ընդլայնվող հարաբերություններին։