Հայաստան

Պատգամավորի կարծիքով՝ միայն տուգանքների բարձրացմամբ խցանումների խնդիրը չի լուծվի

3 րոպեի ընթերցում

Պատգամավորի կարծիքով՝ միայն տուգանքների բարձրացմամբ խցանումների խնդիրը չի լուծվի

Ազգային ժողովում «Հայաստան» խմբակցության պատգամավոր Ագնեսա Խամոյանը հայտարարել է, որ երթևեկության խախտումների համար տուգանքների բարձրացումը բավարար չէ խցանումները նվազեցնելու համար։ Նա անհրաժեշտ է համարել ուսումնասիրել վարորդների վարքագիծը և դիտարկել նաև անհարկի ձայնային ազդանշաններն արձանագրող համակարգերի կիրառման հնարավորությունը։ «Արմենպրես»-ի փոխանցմամբ՝ պատգամավորը նոյեմբերի 17-ի նիստում այս մասին խոսել է ճանապարհային անվտանգությանն առնչվող օրենսդրական փաթեթի քննարկման ժամանակ։

«Ես շարունակում եմ պնդել, որ պետք է վարքագծային վերլուծության ենթարկել մեր երթևեկությունը, մեր վարորդների հոգեբանությունը։ Բոլոր այն խախտումները, որ կան, և բոլոր այն տուգանքները, որ մենք ավելացնում ենք, ես կարծում եմ, որ լուծում չի։ Հատվածական լուծումներով հնարավոր չի հասնել ծանրաբեռնված այս խցանումների նվազեցման»,- ասել է Խամոյանը։

Որպես օրինակ՝ նա անդրադարձել է վճարովի կայանատեղիների սակագների բարձրացմանը՝ նշելով, որ, իր գնահատմամբ, դրանից հետո մայրաքաղաքի կենտրոնում կայանատեղիների խնդիրը չի լուծվել։

Պատգամավորը կասկած է հայտնել նաև երեխաների փոխադրման կանոնները խախտելու համար տուգանքն ավելացնելու արդյունավետության վերաբերյալ։ Նրա կարծիքով՝ եթե վարորդին չի զսպում երեխայի անվտանգությանը սպառնացող վտանգը, ավելի բարձր տուգանքը ևս կարող է չփոխել նրա վարքագիծը։

Խամոյանն անդրադարձել է նաև վարորդների կողմից ձայնային ազդանշանների չարաշահմանը։

«Այսօր ազդանշանը ոչ թե զգուշացնող գործիք է, այլ իր վիրավորանքը և զայրույթը արտահայտելու միջոց»,- նշել է նա։

Պատգամավորը մատնանշել է այն իրավիճակները, երբ լուսացույցի կանաչ ազդանշանը միանալուց անմիջապես հետո վարորդները սկսում են ազդանշաններ տալ՝ ճնշում գործադրելով առջևում գտնվող մեքենայի վարորդի վրա։

Հղում կատարելով արտասահմանյան փորձին՝ Խամոյանն առաջարկել է դիտարկել ակուստիկ տեսահսկման համակարգերի կիրառումը, որոնց միջոցով հնարավոր կլինի արձանագրել անհարկի ազդանշանները։ Նրա գնահատմամբ՝ նման վարքագծի նկատմամբ ֆինանսական ու իրավական հետևանքների կիրառումը կարող է որոշ չափով նպաստել խնդրի լուծմանը։

Միաժամանակ նա ընդգծել է երթևեկության կազմակերպմանն առնչվող հարցերը համապարփակ ուսումնասիրելու անհրաժեշտությունը՝ տեխնիկական զննությունից մինչև իրավախախտումների պատճառների վերլուծություն։

«Ես շարունակում եմ պնդել, որ այս հարցը պետք է համակարգային լուծում ունենա, պետք է ստեղծվի կոնկրետ մի մարմին»,- ասել է Խամոյանը։

 

AREMNPRESS

Հայաստան, Երևան, 0001, Աբովյան 9

+374 10 539818
[email protected]
fbtelegramyoutubexinstagramtiktokdzenspotify

Ցանկացած նյութի ամբողջական կամ մասնակի վերարտադրման համար անհրաժեշտ է «Արմենպրես» լրատվական գործակալության գրավոր թույլտվությունը

© 2026 ARMENPRESS

Ստեղծվել է՝ MATEMAT-ում