1 րոպեի ընթերցում
ԱՄՆ-ն Ռուսաստանի տնտեսության դեմ նոր պատժամիջոցների նախագիծ է մշակել և կկիրառի դրանք, եթե Մոսկվան վերջ չդնի Ուկրաինայում հակամարտությանը:
«Արմենպրես»-ի հաղորդմամբ՝ ինչպես փոխանցում է ՌԻԱ Նովոստին, այս մասին հայտնում է Reuters-ը՝ հղում անելով անանուն պաշտոնյայի։
Աղբյուրը մանրամասնել է, որ Թրամփի վարչակազմը մշակել է լրացուցիչ պատժամիջոցներ, որոնք կարող են կիրառվել Ռուսաստանի տնտեսության հիմնական ոլորտների դեմ, եթե նախագահ Վլադիմիր Պուտինը շարունակի հետաձգել Ուկրաինայի դեմ Մոսկվայի պատերազմի ավարտը։ Նշվում է, որ Միացյալ Նահանգների կողմից մշակված լրացուցիչ պատժամիջոցներից մի քանիսն ուղղված են Ռուսաստանի բանկային ոլորտին և շուկային նավթ մատակարարելու համար օգտագործվող ենթակառուցվածքներին։
Գործակալության տվյալներով՝ որոշ ամերիկացի օրենսդիրներ վերսկսել են ջանքերը՝ Ռուսաստանի դեմ երկար ժամանակ հետաձգված երկկուսակցական պատժամիջոցների օրինագիծը առաջ մղելու համար։
Ըստ հրապարակման՝ անցյալ շաբաթ ուկրաինացի պաշտոնյաները դիմել են ԱՄՆ-ին՝ նոր պատժամիջոցների առաջարկով։ Ներկայացված գաղափարների թվում էին բոլոր ռուսական բանկերին դոլարային վճարային համակարգից իրենց ամերիկացի գործընկերների միջոցով կտրելու միջոցառումները։