Մալաթիա տոնավաճառում բռնկված հրդեհը դեռևս չի մարվել. դեպքի վայր է մեկնել ևս 4 մարտական հաշվարկ
2 րոպեի ընթերցում
Մալաթիա տոնավաճառի կոշիկի պահեստում բռնկված հրդեհը դեռևս չի մարվել: Տեղում աշխատանքներ իրականացնող 6 մարտական հաշվարկին միացել է ևս 4-ը: «Արմենպրես»-ի փոխանցմամբ՝ այս մասին հաղորդագրություն է տարածել Փրկարար ծառայությունը:
«Հոկտեմբերի 23-ին ժամը 14:01-ին Ճգնաժամային կառավարման ազգային կենտրոն ահազանգ է ստացվել, որ Երևան քաղաքի Մալաթիա տոնավաճառի կոշիկի պահեստում հրդեհ է բռնկվել։
Հրդեհի բարդության «Թիվ 2» կանչով դեպքի վայր են մեկնել ՆԳՆ ՓԾ Երևան քաղաքի փրկարարական վարչության հրշեջ-փրկարարական ջոկատներից վեց մարտական հաշվարկ, Հրդեհաշիջման և փրկարարական աշխատանքների կազմակերպման բաժնի հերթապահ և Ճգնաժամային կառավարման ազգային կենտրոնի օպերատիվ խմբերը։
Ժամը 14։54-ին հայտարարվել է հրդեհի բարդության «Թիվ 3» կանչ։
Դեպքի վայր են մեկնել ՆԳՆ ՓԾ Երևան քաղաքի փրկարարական վարչության հրշեջ-փրկարարական ջոկատներից ևս չորս մարտական հաշվարկ և Փրկարարական ուժերի վարչության Հրդեհաշիջման և փրկարարական աշխատանքների կազմակերպման բաժնի խումբը։
Ըստ նախնական տվյալների հրդեհը բռնկվել է մոտ 1000 քմ պահեստային տարածքում»,- նշված է հաղորդագրության մեջ:
Կտրվի լրացուցիչ տեղեկություն։