Ոստիկանության գվարդիան մեկ տարում շուրջ 1000 հանցագործության դեպք է բացահայտել․ ՆԳ նախարարը հետևել է վարժանքին և պարգևներ հանձնել

Ներքին գործերի նախարարության ոստիկանության գվարդիայի ծառայողները մեկ տարվա ընթացքում  բացահայտել են շուրջ 1000 հանցագործության դեպք և ապահովել հասարակական կարգն ու անվտանգությունը բազմաթիվ զանգվածային միջոցառումների ժամանակ:

«Արմենպրես»-ի փոխանցմամբ՝ այս մասին հայտնում են ՀՀ ներքին գործերի նախարարությունից՝ նշելով, որ Արփինե Սարգսյանը, նախարարի տեղակալներ՝ ոստիկանության պետ Կամո Ցուցուլյանը, Արմեն Մկրտչյանը, ՆԳՆ գլխավոր քարտուղար Տիգրան Ենոքյանը ծանոթացել են նոր սպառազինությանն ու տեխնիկային, հատուկ միջոցներին, ապա հետևել Ոստիկանության գվարդիայի ստորաբաժանումների կողմից իրականացվող ամբոխի կառավարման մարտավարական վարժանքին։

Այնուհետև կայացել է աշխատանքային խորհրդակցություն, ինչի ընթացքում ՆԳՆ ոստիկանության գվարդիայի հրամանատար-ոստիկանության պետի տեղակալ Հայկ Բաբայանը ներկայացրել է 1 տարվա ընթացքում  ծառայության գործունեության ամփոփ հաշվետվությունը։

Հայկ Բաբայանը նշել է, որ Ոստիկանության գվարդիան մեկ տարվա ընթացքում շուրջ 1000 հանցագործության դեպք է բացահայտել, ինչպես նաև ապահովել հանրային, մշակութային և սպորտային բազմաթիվ միջոցառումների ժամանակ հասարակական կարգն ու անվտանգությունը։

Գերատեսչությունից նշում են, որ ՆԳ նախարար Արփինե Սարգսյանը որպես կարևոր ձեռքբերում ընդգծել է, որ հասարակական կարգի և անվտանգության ապահովման տեսանկյունից Ոստիկանության գվարդիայի ձևավորմամբ գաղափարական նոր փոփոխություն է ներդրվել։ Անդրադառնալով Ոստիկանության գվարդիայի ծառայողների կողմից հանցագործությունների բացահայտման դրական ցուցանիշին՝ նախարարը շեշտել է, որ անհրաժեշտ է ինտեսիվորեն շարունակել հանցավորության բացահայտման ուղղությամբ հետևողական աշխատանքը։

Արփինե Սարգսյանը կարևորել է նաև բանակցային բաժնի ծառայությունը, ինչը նորություն է այս գործընթացում՝ ընդգծելով կարողությունների զարգացման և ընդլայնման դերը բաժնի հիմնական առաքելության իրականացման շրջանակում։

Նախարարի խոսքով՝ ընթացիկ տարում տեղի ունեցած խոշորամասշտաբ միջոցառումների ժամանակ որևէ լուրջ միջադեպ չի արձանագրվել, ինչը նաև բանակցային բաժնի ծառայողների կատարած աշխատանքի արդյունքն է։

Անդրադառնալով ծառայողների կարողությունների շարունակական զարգացմանը՝ նախարարը կարևորել է վերապատրաստումների դերը, հատկապես ուժային միջոցների գործադրման ստանդարտի պատշաճ ապահովման տեսանկյունից և շեշտել, որ ստանդարտից ցանկացած շեղում անընդունելի է։ ՆԳ նախարարը նաև ընդգծել է Ոստիկանության գվարդիայի ստորաբաժանումների ամբողջական համալրվածության կարևորությունը և հանձնարարել կայուն անձնակազմի ձևավորման ուղղությամբ աշխատանքներ իրականացնել։

Խորհրդակցության ավարտին ՆԳ նախարարն ու Ոստիկանության պետը բարեխիղճ ծառայության համար Ոստիկանության գվարդիայի մի շարք ծառայողների պարգևներ են հանձնել։