2 րոպեի ընթերցում
ԳԱՎԱՌ, 20 ԴԵԿՏԵՄԲԵՐԻ, ԱՐՄԵՆՊՐԵՍ։ Գեղարքունիքի մարզի Մարտունի համայնքի Վարդենիկ գյուղում ավարտվել է Արցախյան պատերազմներում զոհված 26 հայորդու նվիրված հուշահամալիրի կառուցումը, որն իրականացվել է ՀՀ կառավարության կողմից 2023 թվականին իրականացվող սուբվենցիոն ծրագրերի շրջանակներում։
Ինչպես «Արմենպրես»-ին տեղեկացրին Մարտունու համայնքապետարանի աշխատակազմից, Վարդենիկի հուշահամալիրի կառուցման ծրագրի պայմանագրային արժեքը կազմում է 89 միլիոն դրամ, որի 45 տոկոսը հատկացրել է ՀՀ կառավարությունը, 55 տոկոսը՝ Մարտունու համայնքապետարանը։ Հուշահամալիրը կառուցվել է Վարդենիկի Ռիչարդ Հովհաննիսյանի անվան թիվ 1 հիմնական դպրոցի հետնամասում, կենտրոնական փողոցի հարևանությամբ։
Արցախյան պատերազմներում զոհված 26 հայորդու նվիրված հուշահամալիրի տարածքում ստեղծվել է պուրակ՝ ծառապատ և կանաչապատ գոտիով։ Հուշահամալիրն իրենից ներկայացնում է հենապատ՝ 26 խորշով, որտեղ տեղադրվել է յուրաքանչյուրի նկարը և գրվել անուն-ազգանունը։ Հենատապի մեջտեղում բարձրանում է հուշարձանը՝ երեք տերևով և նրանց արանքից բարձրացող բուրգով։ Տերևներից երկուսը խորհրդանշում են Արցախյան երկու պատերազմի, երրորդը՝ խաղաղ ժամանակներում զոհված վարդենիկցի հերոսների հիշատակը, իսկ կենտրոնից բարձրացող բուրգը խորհրդանշում է նոր կյանքի ծիլն ու հարատևությանը։ Գլխավոր մուտքից ճեմուղի է ձգվում դեպի հուշապատ, ճեմուղիում դրվել են նստարաններ, անցկացվել է լուսավորություն, ցայտաղբյուրի և ոռոգման համար՝ ջրամատակարարման համակարգ։ Հուշահամալիրը դպրոցի տարածքից անջատվել է կանաչապատ գոտիով։ Հուշահամալիրը կառուցվել է Խաչիկ Սարգսյանի ճարտարապետությամբ։