2 րոպեի ընթերցում
ԳԱՎԱՌ, 13 ԴԵԿՏԵՄԲԵՐԻ, ԱՐՄԵՆՊՐԵՍ։ Գեղարքունիքի մարզի Մարտունի համայնքի ղեկավար Հովհաննես Հովեյանն ընդունել է բազկամարտի աշխարհի չեմպիոն Ազատ Սրապյանին։
Ինչպես «Արմենպրես»-ին տեղեկացրին Մարտունիի համայնքապետարանի աշխատակազմից, այս տարվա օգոստոսի 25-ին Մոլդովայի մայրաքաղաք Քիշնևում կայացած բազկամարտի աշխարհի առաջնությանը 70 կգ քաշային կարգում Մարտունի համայնքի բնակիչ Ազատ Սրապյանն աջ ձեռքով հաղթել է մրցակցին՝ ճանաչվելով աշխարհի չեմպիոն, իսկ ձախ ձեռքով նվաճել բրոնզե մեդալ։
Հոկտեմբերի 1-ին ՀՀ ԿԳՄՍ նախարարի հրամանով Ազատ Սրապյանին շնորհվել է «ՀՀ միջազգային կարգի սպորտի վարպետ» և «ՀՀ սպորտի վարպետ» մարզական կոչումները։
Մարտունի համայնքի ղեկավար Հովհաննես Հովեյանը շնորհավորել և քաջալերել է չեմպիոնին՝ վաստակած հաղթանակների և կոչումների արժանանալու առթիվ, ինչպես նաև հետաքրքրվել մարզիկի հետագա ծրագրերով։
Ազատ Սրապյանը հայտնել է, որ ցանկություն ունի Մարտունի համայնքում զարգացնել ու մասսայականացնել բազկամարտը։ Չեմպիոնի տեսլականը համայնքի ղեկավարի կողմից արժանացել է հավանության, փոխադարձ պայմանավորվածությամբ առաջիկայում համայնքապետարանի աջակցությամբ Մարտունի համայնքում կկազմակերպվի Հայաստանի բազկամարտի մինչև 18 տարեկանների հանրապետական առաջնություն։
Ազատ Սրապյանը Մարտունի համայնքի ղեկավար Հովհաննես Հովեյանի կողմից արժանացել է շնորհակալագրի և դրամական պարգևի։