1 րոպեի ընթերցում
ԵՐԵՎԱՆ, 5 ՆՈՅԵՄԲԵՐԻ, ԱՐՄԵՆՊՐԵՍ։ Տարածքային կառավարման և ենթակառուցվածքների նախարար Գնել Սանոսյանը ներկայացրել է 2025 թվականի բյուջեում նախատեսված ֆինանսավորումը, որն ուղղված է Հայաստանի մարզերի և համայնքների զարգացմանը։ «Արմենպրես»-ի հաղորդմամբ՝ ԱԺ մշտական հանձնաժողովների համատեղ նիստում 2025 թվականի պետական բյուջեի մասին օրենքի նախագծի նախնական քննարկումների ժամանակ Սանոսյանը նշեց, որ բյուջեի 154.6 միլիարդ դրամը հատկացվելու է տարածքային կառավարման ոլորտին, որի հիմնական մասը՝ 108 միլիարդ դրամ, տրամադրվելու է տարածքային զարգացման ծրագրերին։
«ՏԻՄ գործընկերների համար ուրախալի նորություն է, որ դոտացիաների չափը 2025 թվականի բյուջեով կաճի՝ հասնելով 98.2 միլիարդ դրամի, ինչը 13 միլիարդով ավելի է 2024 թվականի համեմատ»,- նշեց նախարարը։
Բացի այդ, Սանոսյանը տեղեկացրեց, որ մարզերում սուբվենցիոն ծրագրեր իրականացնելու համար նախատեսված է 16 միլիարդ դրամ։ Մանկապարտեզների սուբվենցիոն ծրագրերի գումարները կտրամադրվեն ԿԳՄՍ նախարարության բյուջեից։
Նախարարը նշեց նաև սահմանամերձ համայնքներին աջակցող ծրագրերը՝ ընդգծելով, որ 23 համայնքների 82 բնակավայրեր կշարունակեն օգտվել արտոնություններից, որոնց համար նախատեսված է 1 միլիարդ դրամ։