Հայաստանն ու Հնդկաստանը միմյանց առաջարկելու շատ բան ունեն․ հնդիկ փորձագետ
5 րոպեի ընթերցում
![Հայաստանն ու Հնդկաստանը միմյանց առաջարկելու շատ բան ունեն․ հնդիկ փորձագետ](http://armenpress.am/resized/480/storage/images/articles/2024/09/10/3xWckKuXiDSGqZNJ1OoWSaOugCb79qVO415WI9q0.webp)
ԵՐԵՎԱՆ, 10 ՍԵՊՏԵՄԲԵՐԻ, ԱՐՄԵՆՊՐԵՍ: Հայաստանը շատ բան ունի առաջարկելու Հնդկաստանին, վերջինս էլ շատ բան ունի առաջարկելու Հայաստանին: Հայաստանն ու Հնդկաստանը փոխշահավետ գործընկերության օրակարգ ունեն, որտեղ երկուսն էլ գիտակցում են միմյանց կարևորությունը համաշխարհային գործերում:
«Արմենպրես»-ի հետ զրույցում նման կարծիք հայտնեց «Երևանյան երկխոսություն» խորագիրը կրող միջոցառման մասնակից, հնդկական առաջատար Observer Research Foundation ուղեղային կենտրոնի նախագահ Սամիր Սարանը:
Բնութագրելով «Երևանյան երկխոսություն» համաժողովի կազմակերպումը և միջոցառման նշանակությունը՝ Սամիր Սարանը նշեց. «Մենք կրկին կապվել ենք Հայաստանի մեր ընկերների հետ։ Մենք աշխատել ենք վերջին ամիսների ընթացքում՝ կազմելու միջոցառման օրակարգ, որը կարևոր է աշխարհի համար: Այս միջոցառման շրջանակներում մենք բացահայտել ենք տարբեր երկրների խոսնակների։ Այստեղ ներկա են ավելի քան 61 երկրի ներկայացուցիչներ, որոնք կարող են նպաստել արդյունավետ հաղորդակցությանը»:
Սարանի խոսքով՝ միջոցառման համար կազմվել է շատ հարուստ ժամանակացույց, որպեսզի մասնակիցները ոչ միայն մասնակցեն բանավեճերի և քննարկումների, այլև մի փոքր տեսնեն Հայաստանն ու ժամանակակից հայկական զարգացումները։
«Միջոցառումը, կարելի է ասել, մի խառնուրդ է՝ երկրի մասին պատկերացում կազմելու, մասնակիցներին հնարավորություն տալու քննարկել կարևոր հարցեր, և ամենակարևորը՝ ընկերություն հաստատել, որն իր ծագումը կունենա Երևանում: Շատ նոր ընկերություններ այժմ կձևավորվեն Երևանում», - իր խոսքում նշեց զրուցակիցը:
Սամիր Սարանը նաև իր գոհունակությունը հայտնեց այն առումով, որ աշխատել է ՀՀ արտաքին գործերի նախարարության իր գործընկերների հետ և քաղաքացիական հասարակության շատ այլ անդամների հետ:
Պատասխանելով հարցին, թե ո՞րն է իր կարծիքով «Երևանյան երկխոսության» հիմնական ուղերձը՝ Սարանը կարծիք հայտնեց, որ փոքր երկրները, որոնք ունեն ուժեղ ինստիտուտներ և նորարարության ախորժակ, պետք է դառնան գործընկերներ և մասնակիցներ գաղափարների ասպարեզում, որտեղ քննարկվում են վաղվա լուծումները:
«Երկրների կարևորությունը հիմնված է ոչ թե նրանց չափերի, այլ նրանց իրավասությունների և հնարավորությունների վրա, իսկ Հայաստանը շատ գրագետ և կարող պետություն է, որն աշխարհին առաջարկելու շատ բան ունի։ Եվ դա է հիմնական ուղերձը. եկեք Հայաստան, խոսեք մեզ հետ, մարդիկ լսում են ձեզ, դուք լսեք մեզ և եկեք կառուցենք ավելի լավ ապագա», - շեշտեց Սամիր Սարանը։
Վերջինս, անդրադառնալով Հայաստանի և Հնդկաստանի միջև վերջին տարիներին առավել խորացող հարաբերություններին և համագործակցությանն, ընդգծեց, որ ուժեղ և բարգավաճ Հայաստանը կարևոր է տարածաշրջանի համար, իսկ այս տարածաշրջանը կարևոր է աշխարհի համար։
«Մենք պետք է անենք այն ամենն, ինչը հզորացնում է Հայաստանին, ինչը Հայաստանին դարձնում է ունակ՝ նպաստելու համաշխարհային գործերին, արձագանքելու տարածաշրջանային մարտահրավերներին, խնդիրներին ու հնարավորություններին»,- նշեց Սարանը:
Սարանի կարծիքով՝ հայ-հնդկական հարաբերություններն ամրապնդում են երկու երկրներին․ այդ հարաբերություններն ուժեղացնում են Հայաստանին, որպեսզի նա կարողանա խաղալ այն դերը, որին ձգտում է, դրանք ուժեղացնում են նաև Հնդկաստանին, քանի որ վերջինս օգուտ է քաղում հարուստ թվային նորարարություններից և գաղափարներից, որոնք դուրս են գալիս Հայաստանից:
«Կարծում եմ՝ Հայաստանը շատ բան ունի առաջարկելու Հնդկաստանին։ Հնդկաստանը շատ բան ունի առաջարկելու Հայաստանին։ Այսպիսով, դա փոխշահավետ գործընկերություն է, որտեղ երկուսս էլ գիտակցում ենք միմյանց կարևորությունը համաշխարհային գործերում», - զրույցի ընթացքում շեշտեց հնդկական առաջատար Observer Research Foundation ուղեղային կենտրոնի նախագահ Սամիր Սարանը:
Գնահատելով Հայաստանի կառավարության կողմից տարածաշրջանում խաղաղություն հաստատելու օրակարգը՝ Սամիր Սարանը նկատեց.
«Հայաստանն ունի շատ հեռատես վարչապետ, որն այս դժվարին ժամանակահատվածում մտածում է խաղաղության մասին: Այսօր առավոտյան նա ներկայացրեց խաղաղության ծրագիրը: Մենք պետք է ծափահարենք նրան և աջակցենք նրա ջանքերին: Կարծում եմ՝ մեզ պետք են ավելի շատ առաջնորդներ, որոնք ձգտում են խաղաղության, ոչ թե պատերազմի: Աշխարհում կան շատ առաջնորդներ, որոնք հետամուտ են պատերազմին: Հայաստանի վարչապետը խաղաղության է ձգտում, և ես կարծում եմ՝ դա մեծ ներդրում է, շատ հազվադեպ հատկություն այսօրվա աշխարհում»: