Իրանի և Պակիստանի դեսպաններն իրենց պարտականությունների կատարմանը կվերադառնան հունվարի 26-ին
2 րոպեի ընթերցում
ԵՐԵՎԱՆ, 22 ՀՈՒՆՎԱՐԻ, ԱՐՄԵՆՊՐԵՍ: Իսլամաբադում Իրանի դեսպանը, ինչպես նաև Թեհրանում Պակիստանի դեսպանն իրենց պարտականությունների կատարմանը կվերադառնան հունվարի 26-ից։ Ինչպես «Արմենպրես»-ը տեղեկանում է ՏԱՍՍ գործակալությունից, այդ մասին ասված է երկու երկրների արտաքին քաղաքական գերատեսչությունների համատեղ հայտարարության մեջ։
«Պակիստանի և Իրանի Իսլամական Հանրապետության արտաքին գործերի նախարարների հեռախոսազրույցի արդյունքներով համաձայնություն է ձեռք բերվել, որ երկու երկրների դեսպանները կարող են վերադառնալ իրենց պաշտոններին 2024 թվականի հունվարի 26-ին», - նշված է Պակիստանի ԱԳՆ կայքում հրապարակված տեքստում։
Բացի այդ, հայտարարության համաձայն` «արտաքին գործերի նախարար Ջալիլ Աբաս Ջիլանիի հրավերով Իրանի Իսլամական Հանրապետության արտաքին գործերի նախարար Հոսեյն Ամիր Աբդոլլահիանը 2024 թվականի հունվարի 29-ին այց կկատարի Պակիստան»։
Հունվարի 16-ին Իրանը հարվածներ էր հասցրել Պակիստանի տարածքին՝ նշելով, որ թիրախավորել է «Ջաիշ ալ Ադլ» ահաբեկչական խմբավորման երկու հենակետ։ Պակիստանը հայտնել էր, որ այդ հարվածների հետևանքով 2 երեխա է զոհվել, և Իրանին նախազգուշացրել էր հնարավոր հետևանքների մասին։
Իսկ հունվարի 18-ին Պակիստանն էր հարվածել Իրանի Սիստան և Բելուջիստանի նահանգին՝ դա պատճառաբանելով նրանով, որ թիրախավորում է անջատողական զինյալների թաքստոցները։ Այս հարվածների հետևանքով զոհվել էր 10 մարդ, այդ թվում՝ 4 երեխա: