Բարաք Օբամայի ուղերձում ուղղակիորեն մատնանշված են ցեղասպանություն հանցագործության բոլոր տարրերը. Դավիթ Հարությունյան

ԵՐԵՎԱՆ, 24 ԱՊՐԻԼԻ, ԱՐՄԵՆՊՐԵՍ: Հայոց ցեղասպանության 101-րդ տարելիցի նախօրեին ԱՄՆ նախագահ Բարաք Օբամայի ուղերձում ուղղակիորեն մատնանշված են ցեղասպանություն հանցագործության բոլոր տարրերը: Հայոց ցեղասպանության հուշահամալիրում լրագրողների հետ զրույցում այս մասին նշեց ՀՀ կառավարության աշխատակազմի ղեկավար-նախարար Դավիթ Հարությունյանը:

«Այսինքն` այն, ինչ միջազգային փաստաթղթերում անվանվում է ցեղասպանություն, Օբաման ուղղակի արտաբերում է իր ելույթում: Կարծում եմ, որ այս տեսանկյունից մենք պետք է հակառակ քայլը կատարենք և հայտնենք մեր շնորհակալությունը, որ մարդը փաստացի տեղի ունեցածն անվանում է ցեղասպանություն »,- «Արմենպրես»-ի փոխանցմամբ, նշեց նա` հավելելով, որ Օբաման պարզապես «ցեղասպանություն» բառը չի օգտագործում` ելնելով քաղաքական նկատառումներից:

Դավիթ Հարությունյանը կարծում է, որ տարեցտարի ավելի ակտիվանալու է նաև Հայոց ցեղասպանության միջազգային ճանաչման և ընդհանրապես մարդկության դեմ հանցագործությունների դեմ պայքարի շարժումը:

Հարությունյանը ցավով նկատեց, որ այս պահին որոշ երկրներ, ելնելով իրենց ազգային շահերից, չեն ճանաչում Հայոց ցեղասպանությունը:

Ապրիլի 24-ին հիշատակի արարողություններ են տեղի ունենում Հայաստանի բոլոր շրջաններում, աշխարհի տարբեր երկրների հայկական համայնքներում: Բողոքի կոչ է բարձրացվում Թուրքիայի մերժողական քաղաքականության դեմ եւ ուղերձ հղվում միջազգային հանրությանը` ճանաչելու 20-րդ դարասկզբի մեծագույն ոճրագործությունը` դրանով թույլ չտալով ցեղասպանությունների կրկնություն: Հայ առաքելական եկեղեցու բոլոր թեմերում մատուցվում է հոգեհանգստյան պատարագ: 1915թ. Օսմանյան կայսրությունում հայ բնակչության մասայական կոտորածները որպես նախապես ծրագրավորված ու ամբողջությամբ իրագործված ցեղասպանական ակտ որակող փաստաթղթերի ամբողջական շարքը հսկայական է: Հայոց ցեղասպանությունն ընդունել են այնպիսի կազմակերպություններ, ինչպիսիք են Եվրոպայի Խորհուրդը, Եվրախորհրդարանը, ՄԱԿ-ի մի քանի հանձնաժողովներ, Եկեղեցիների համաշխարհային միությունը, ՄԵՐԿՈՍՈւՐ-ի խորհրդարանը եւ այլն: Հայոց ցեղասպանությունը ճանաչել են շատ պետություններ. առաջինը պաշտոնապես ընդունել է Ուրուգվայը 1965 թ.: Հայ ժողովրդի կոտորածը պաշտոնապես քննադատել եւ, ըստ միջազգային իրավունքի, որպես ցեղասպանություն ճանաչել են հետեւյալ երկրները` Ֆրանսիա, Իտալիա, Բելգիա, Նիդեռլանդներ, Շվեյցարիա, Շվեդիա, Ռուսաստան, Լեհաստան, Լիտվա, Հունաստան, Սլովակիա, Կիպրոս, Լիբանան, Ուրուգվայ, Արգենտինա (2 օրենք, 5 բանաձեւ), Վենեսուելա, Չիլի, Կանադա, Վատիկան, Ավստրալիա, Ավստրիա, Լյուքսեմբուրգ, նաև ԱՄՆ 44 նահանգներ: