2 րոպեի ընթերցում
ԵՐԵՎԱՆ, 30 ՄԱՐՏԻ, ԱՐՄԵՆՊՐԵՍ: Բազմահազար հայ մանուկներ իրենց ծնողների հետ Անթիլիասում տոնել են Ծաղկազարդի տոնը: Այս մասին «Արմենպրես»-ը տեղեկացավ Կիլիկիո Կաթողիկոսության պաշտոնական կայքից: Ն.Ս.Օ.Տ.Տ. Արամ Ա Կաթողիկոսը հանդես է եկել խոսքով. «Այսօր մենք դիմավորում ենք մեր Փրկիչի հաղթական մուտքը Երուսաղեմ: Ի՜նչ գեղեցիկ է տեսնել մեր մանուկներին իրենց ծնողների հետո, որոնք եկել են ծաղկազարդի խորհուրդով ծաղկազարդելու իրենց կյանքը»:
Անթիլիասի մայրավանքում հավաքված բազմահազար ժողովրդին ուղղված իր պատգամից հետո Նորին Սրբությունը անդրադարձել է Հայոց Ցեղասպանության 100-ամյա տարելիցին՝ նշելով, որ 100 տարի առաջ ցեղասպան թուրքը մեր նախահայրերին ու նախամայրերին է սպանել, ցանկացել է բնաջնջել հայ ժողովրդին ու Հայաստանը ջնջել աշխարհի քարտեզից, սակայն չի հաջողվել:
«Այսօր հայ ժողովուրդը պահանջատեր է, նա պահանջում է Հայոց Ցեղասպանության ճանաչումը և իր իրավունքների հատուցումը: Այս ոգով և հանձնառությամբ մենք պետք է մեր մանուկներին դաստիարակենք մեր ընտանիքներում և դպրոցներում»,- նշել է Վեհափառ Հայրապետը:
Հայրապետական պատգամից հետո Արամ Ա. Կաթողիկոսը վեհարանում ընդունել է հայ մանուկներին ու նրանց ծաղիկները: Տեղի է ունեցել աջահամբույր:
Վահեափառ Հայրապետը բոլոր մանուկներին նվերներ է բաժանել: