Արարատ Միրզոյանը կարևորել է գործընկերների հետ համագործակցությունը հիբրիդային սպառնալիքներին դիմակայելու հարցում
2 րոպեի ընթերցում

Հայաստանը պատրաստ է շարունակել համախոհ գործընկերների հետ համատեղ աշխատանքը՝ հիբրիդային սպառնալիքներին, այդ թվում՝ օտարերկրյա տեղեկատվական մանիպուլյացիաներին և միջամտության փորձերին դիմակայելու ուղղությամբ։ Այս մասին ընդգծել է ՀՀ արտաքին գործերի և միջազգային առևտրի նախարար Արարատ Միրզոյանը՝ նոյեմբերի 16-ին Բրյուսելում ելույթ ունենալով «Սևծովյան տարածաշրջանում անվտանգության հանձնառությունների առաջմղում» թեմայով քննարկմանը։
«Արմենպրես»-ին նախարարությունից տեղեկացրին, որ քննարկումն անցկացվել է «Միջտարածաշրջանային անվտանգություն և փոխկապակցվածություն» խորագրով նախարարական հանդիպման շրջանակում։
Միրզոյանը նշել է, որ տեղեկատվական մանիպուլյացիաներն ու միջամտության փորձերը միտված են ինքնիշխանության թուլացմանը և ժողովրդավարական ինստիտուտների նկատմամբ հանրային վստահության խաթարմանը։ Նա կարևորել է այդ սպառնալիքներին դիմակայելու հարցում գործընկերների համագործակցության ամրապնդումը։
Նախարարն ընդգծել է նաև Հարավային Կովկասում հաստատված խաղաղության նշանակությունը Սևծովյան ավելի լայն տարածաշրջանում տնտեսական զարգացման և փոխկապակցվածության խթանման համար՝ կարևորելով ԵՄ ռազմավարական մոտեցումն այս ուղղությամբ։
Անդրադառնալով 2025 թվականի օգոստոսի 8-ի Վաշինգտոնի խաղաղության գագաթնաժողովի արդյունքներին՝ Միրզոյանը խոսել է Հայաստանի և Ադրբեջանի միջև խաղաղության հաստատման, տարածաշրջանային հաղորդակցությունների բացման պայմանավորվածությունների և արդեն ձևավորվող տնտեսական կապերի մասին՝ դրանք ներկայացնելով որպես խաղաղության անմիջական օգուտներ։
Նա անդրադարձել է նաև Թուրքիայի հետ հարաբերությունների լիարժեք կարգավորման և սահմանի բացման ուղղությամբ շարունակվող ակտիվ երկխոսությանը։
Քննարկմանը ելույթ են ունեցել ԵՄ արտաքին գործերի և անվտանգության քաղաքականության հարցերով բարձր ներկայացուցիչ Կայա Կալասը, ընդլայնման հարցերով հանձնակատար Մարթա Կոսը, ինչպես նաև ԵՄ անդամ պետությունների, Ուկրաինայի, Մոլդովայի, Թուրքիայի և Ադրբեջանի արտաքին գործերի նախարարները կամ նրանց տեղակալները։