Շիրակի մարզում ստեղծվել է հատուկ հանձնաժողով՝ կարկտահարության հետևանքով պատճառված վնասները գնահատելու համար
1 րոպեի ընթերցում
Շիրակի մարզպետ Դավիթ Առուշանյանի հանձնարարությամբ ստեղծվել է հատուկ հանձնաժողով՝ տեղացած կարկուտի հետևանքով պատճառված վնասները գույքագրման և գնահատման նպատակով։
Ինչպես «Արմենպրես»-ին տեղեկացրին Շիրակի մարզպետի աշխատակազմից, Արտակարգ իրավիճակների հետևանքով հասցված վնասների գնահատման Շիրակի մարզային հանձնաժողովը մարզում, մասնավորապես՝ Գյումրի քաղաքում, սկսել է տեղացած ուժեղ կարկուտի հետևանքով պատճառված գույքային վնասների գնահատման աշխատանքները։
Վնասների գույքագրումն իրականացվում է տեղում՝ յուրաքանչյուր համայնքում։ Շիրակի մարզային հանձնաժողովը, համագործակցելով համայնքային հանձնաժողովների հետ, ուսումնասիրելու և ճշտելու է պատճառված վնասների ծավալը։
Հաշվառվելու են նաև գյուղատնտեսական նշանակության հողատարածքներին և մշակաբույսերին հասցված վնասները։
Աշխատանքների կազմակերպման ընթացքին և հետագա անելիքներին վերաբերող հարցերի քննարկման նպատակով անցկացվել է խորհրդակցություն, որին մասնակցել են Շիրակի մարզպետի տեղակալ Ալբերտ Այվազյանը, ՀՀ ՆԳՆ փրկարար ծառայության Շիրակի մարզային փրկարարական վարչության պետ Արմեն Ափոյանը, ինչպես նաև մարզպետի աշխատակազմի և փրկարար ծառայության պատասխանատու պաշտոնյաներ: