Թրամփը Կոնգրեսի հանրապետականներին կոչ է արել 350 միլիարդ դոլար հատկացնել Պենտագոնին
2 րոպեի ընթերցում
Միացյալ Նահանգների նախագահ Դոնալդ Թրամփը Հանրապետական կոնգրեսականներին կոչ է արել հավանություն տալ Պատերազմի նախարարությանը լրացուցիչ ֆինանսավորում հատկացնող նախագծին։
«Սույնով ես կոչ եմ անում Կոնգրեսի հանրապետականներին՝ անհապաղ ներկայացնել և ընդունել մշակվող 350 միլիարդ դոլարի Recon 3.0 օրինագիծը․․․ Ոչ մի խաղ, ոչ մի հետաձգում, հնարավորինս շուտ արեք դա», - «Արմենպրես»-ի փոխանցմամբ, գրել է Թրամփը Truth Social-ում։
Նրա խոսքով, փաստաթղթում Պենտագոնի խնդրանքով նաև կներառվի այսպես կոչված «Ամերիկան փրկելու մասին ակտը» (The save America act)։
ԱՄՆ-ի նախագահի կարծիքով՝ Recon 3.0-ի ընդունումն անհրաժեշտ է, որպեսզի ռազմական բյուջեն միագումար հասնի 1,5 տրիլիոն դոլարի։
«Մենք կպաշտպանենք հայրենիքը «Ոսկե գմբեթի» օգնությամբ, կստեղծենք անպարտելի «Ոսկե նավատորմ», երկնքում կգերիշխենք F-47 և B-21 ինքնաթիռներով, զգալիորեն կհամալրենք մեր զինապահեստները և կհասնենք ԱՄՆ-ի տիեզերական ուժերի ու անօդաչու թռչող սարքերի լիակատար գերազանցության», - հավելել է նախագահը։
Թրամփի գրառումը վերահրապարակել է ԱՄՆ-ի պատերազմի նախարար Փիթ Հեգսեթը և ավելացրել․ «Շնորհակալություն, պարոն նախագահ։ Պատերազմի նախարարությունը կանի դա»։