1 րոպեի ընթերցում
Մանկավարժական նորարարական գաղափարների, փորձի և ստեղծագործ մոտեցումների միահյուսմամբ ապրիլի 25-ին Գյումրիում անցկացվել է «Մանկավարժական մտքի փառատոնը»։ Ինչպես հաղորդում է «Արմենպրես»-ը, միջոցառումն իրականացվել է Երևանի «Գլոբալ Բրիջ» կրթահամալիրի և Գյումրու թիվ 20 հիմնական դպրոցի համագործակցությամբ։ Փառատոնն առանձնահատուկ էր նրանով, որ առաջին անգամ էր հյուրընկալվում Գյումրի քաղաքում։
Կրթական այս տոնը միավորել է Հայաստանի տարբեր մարզերի ուսուցիչների, կրթական կառույցների ղեկավարների, մեթոդիստների և ոլորտի նորարար մասնագետների։ Նախաձեռնության հիմնական նպատակն էր խթանել մասնագիտական համագործակցությունը և բացահայտել կրթական առաջընթացի նոր հորիզոններ՝ ստեղծելով միջավայր, որտեղ մանկավարժները կարող են կիսվել իրենց ձեռքբերումներով։
Մասնակիցները հնարավորություն են ունեցել ներկայացնելու սեփական փորձը, ծանոթանալու կրթական ոլորտի ժամանակակից միտումներին և համախմբվելու մանկավարժության զարգացման գաղափարի շուրջ։ Միջոցառման ընթացքում ծավալված քննարկումներն ու գործնական ներկայացումները նպաստել են մասնագիտական կապերի ամրապնդմանը և կրթական նորարարությունների տարածմանը։