2 րոպեի ընթերցում
Թուրքիայի խորհրդարանում իշխող «Արդարություն և զարգացում» կուսակցության (ԱԶԿ) խորհրդարանական խմբակցության նիստում ելույթ ունենալով՝ Թուրքիայի նախագահ Ռեջեփ Թայիփ Էրդողանն անթույլատրելի է համարել Թուրքիայի և նրա ղեկավարի հասցեին այլ երկրներից հնչող վիրավորանքները:
Ինչպես հաղորդում է «Արմենպրես»-ը, վկայակոչելով թուրքական ԶԼՄ-ները, Էրդողանը հայտարարել է, որ Թուրքիայի Հանրապետությունը սովորական պետություն չէ և ոչ մի ուժ իրավունք չունի սպառնալ ո՛չ Թուրքիային, ո՛չ էլ նրա նախագահին:
«Թող ոչ ոք չմտածի մեր զսպվածության և առողջ բանականության թուլության մասին։ Մենք թույլ չենք տա, որ որևէ մեկը խաբվի այս հարցում։ Նրանք, ովքեր կարծում են, որ կարող են ստրկացնել այս ազգը, պետք է իմանան, որ մենք ունենք ուժ և վճռականություն՝ անհրաժեշտության դեպքում լեռներ տեղաշարժելու համար», - ասել է Էրդողանը։
Նրա խոսքով՝ նրանք, ովքեր չեն ցանկանում, որ Թուրքիան ազատվի 40 տարվա ահաբեկչությունից, չեն թաքցնում իրենց դժգոհությունն այդ գործընթացից:
Ավելի վաղ Թուրքիայի արտաքին գործերի նախարարությունը կտրուկ քննադատել էր Իսրայելի վարչապետ Բենիամին Նեթանյահուին՝ ԱՄՆ-Իրան բանակցությունների վերաբերյալ իր դիրքորոշման և Թուրքիայի նախագահ Ռեջեփ Թայիփ Էրդողանի վրա հարձակումների համար։
Թուրքիայի արտաքին գործերի նախարարության հայտարարության մեջ նշվում էր, որ Իսրայելը նպատակ ունի խաթարել ընթացող խաղաղության բանակցությունները և շարունակել իր էքսպանսիոնիստական քաղաքականությունը տարածաշրջանում։