ՀՀ-ԵՄ հարաբերությունները լիովին նոր փուլ են տեղափոխվել. ՆԳ նախարար

Հայաստանի և Եվրամիության հարաբերությունները լիովին նոր փուլ են տեղափոխվել ռազմավարական գործընկերության տեսանկյունից:

«Արմենպրես»-ի հաղորդմամբ ՝ այս մասին ասաց Ներքին գործերի նախարար Արփինե Սարգսյանը «Վիզաների ազատականացման ուղին. ԵՄ-Հայաստան համագործակցության ամրապնդումը վիզաների ազատականացման գործողությունների ծրագրի իրականացման շրջանակում» պանելային քննարկման իր բացման խոսքում:  

«Վիզաների ազատականացման պրոցեսը միայն վիզայի տեսանկյունից պրոցեսի դյուրացման մասին չէ, սա մեզ համար նաև շատ կարևոր ռազմավարական մոտեցում է՝ շարունակելու և ամրապնդելու այն ռեֆորմային օրակարգը, որ այս պահին ՀՀ-ն որդեգրել է՝ միգրացիոն ռազմավարության տեսանկյունից, սահմանների համալիր կիրառման, մարդու իրավունքների պաշտպանության և մնացյալ բոլոր ուղղություններով»,-ասաց նախարարը:

Սարգսյանը վերահաստատեց ՀՀ կառավարության հանձնառությունը՝ լիարժեք իրականացնելու վիզաների ազատականացման երկխոսության շրջանակում գործողությունների ծրագրում ներառված յուրաքանչյուր կետի կատարման տեսանկյունից: «Մեզ համար կարևոր է այն հանգամանքը, որ գործողությունների ծրագիրը Հայաստանի հանձնառության մասին է խոսում: Եվ սա է շատ հաճախ թույլ տալիս մեզ ավելի արագ առաջ ընթանալ»,-նշեց նախարարը:

Նա վստահեցրեց՝ Հայաստանն ամբողջ պրոցեսն իրականացնում է ինստիտուցիոնալ մեխանիզմով: Ստեղծվել են մի շարք մեխանիզմներ, որ գործողությունների ծրագիրը չմնա անձով պայմանավորված կատարվող գործողությունների ծրագիր:

«Վիզաների ազատականացումը մեզ համար մարդկանց մասին է, մարդկանց հնարավորություն տալու մասին է, սա մշակութային, սոցիալական կապեր, մարդկանց շփումների նոր մակարդակ հաստատելու մասին է: Մենք արդեն իսկ նաև վիզաների ազատականացման երկխոսության շրջանակներում, նաև դրանից դուրս՝ ՀՀ-ԵՄ հարաբերությունների տեսանկյունից մի շարք առաջընթացներ են գրանցել տարբեր ոլորտներում: Նկատում ենք, որ ՀՀ-ԵՄ հարաբերությունները լիովին նոր փուլ են տեղափոխվել ռազմավարական գործընկերության տեսանկյունից: Վստահ եմ, որ վիզաների ազատականացման թեման ևս թույլ կտա մեզ ընդլայնելու մեր գործընկերությունը և նորանոր արդյունքներ նվաճելու երկկողմ հարաբերությունների, նաև քաղաքացիների տեսանկյունից»,-ասաց Սարգսյանը:

Նախարարը շնորհակալություն հայտնեց ԵՄ գործընկերներին՝ ցուցաբերած ծրագրային և դրանով պայմանավորված ֆինանսական աջակցության համար: