Հայաստանում անձրևներին կհաջորդի առանց տեղումների եղանակը, ջերմաստիճանը կնվազի 5-7 աստիճանով, այնուհետև նույնքան կբարձրանա

Հայաստանի տարածքում հոկտեմբերի 12-ի ուշ երեկոյան՝ առանձին շրջաններում, 13-ին՝ շրջանների մեծ մասում սպասվում են տեղումներ, լեռնային առանձին շրջաններում՝ ձնախառն անձրևի տեսքով։ Ինչպես «Արմենպրես»-ին տեղեկացրին ՀՀ շրջակա միջավայրի նախարարության Հիդրոօդերևութաբանության և մոնիթորինգի կենտրոնից, հոկտեմբերի 14-17-ին սպասվում է առանց տեղումների եղանակ։ 

«Քամին՝ հյուսիսարևմտյան՝ 2-5 մ/վ, հոկտեմբերի 13-ին առանձին շրջաններում սպասվում է քամու ուժգնացում՝ 17-20 մ/վ արագությամբ։ Օդի ջերմաստիճանը հոկտեմբերի 13-ի ցերեկը կնվազի 5-7 աստիճանով, այնուհետև նույնքան կբարձրանա»,- ասվում է հաղորդագրության մեջ։

Երևան քաղաքում հոկտեմբերի 12-ի ուշ երեկոյան ժամերին, 13-ին սպասվում է անձրև։ Հոկտեմբերի 14-17-ին սպասվում է առանց տեղումների եղանակ։