2 րոպեի ընթերցում
Գեղարքունիքի մարզի Սևանի համայնքապետարանի և «Զենիթ» ակադեմիայի միջև ստորագրվել է փոխըմբռնման հուշագիր, որի առանցքում «Ընտանիքի տեխնոլոգիական զարգացում» նախագծի իրականացումն է:
Ինչպես «Արմենպրես»-ին տեղեկացրին Սևանի համայնքապետարանի աշխատակազմից, «Զենիթ» ակադեմիան («ՏՈՒԿ ՖԱԱՌԱԼՊ» Տեխնոլոգիական ուսուցման Կենտրոն-Օվերն-Ռոն-Ալպեր Հայկական ֆեդերացիա» կրթական հիմնադրամ) «Ընտանիքի տեխնոլոգիական զարգացում» նախագծի շրջանակներում իրականացնելու է «Արևային համակարգերի ընդհանուր տեխնոլոգիական գիտելիքներ» դասընթացը, որի նպատակն է Սևան համայնքում արևային էներգետիկայի մասնագիտական ներուժի բարելավումը:
Ծրագրի ընթացքում նախատեսվում է համայնքի բնակչության հմտությունների ու կարողությունների զարգացում կանաչ տնտեսության և տեխնոլոգիական ոլորտում, նորարական մոտեցումների կիրառում, սոցիալ-տնտեսական ու բնապահպանական կայուն զարգացում, իրականացվող գործողությունների արդյունքում գործազրկության նվազեցում և միգրացիոն հոսքերի սահմանափակում:
«Ծրագրի շահառուները ոչ թե միայն անհատներն են, այլ ամբողջական ընտանիքները, որտեղ ընտանիքի յուրաքանչյուր անդամ լինելու է մասնակից իրականացվող ծրագրային գործողությունների: Սա ընտանիքների կյանքի որակի բարելավման, ինքնաբավ լինելու, նոր հմտությունների ձեռք բերման լավագույն հնարավորություն է, որը տեղական իշխանության համար առաջնահերթություն ներկայացնող խնդիրներից մեկն է:
Սևանի համայնքապետարանը պատրաստակամ է տրամադրել աջակցություն նախագծի իրականացման ընթացքում, որը ներառելու է տեխնիկական, կազմակերպչական, հավաքագրման հանրայնացման բաղադրիչներ»,- ներկայացրին Սևանի համայնքապետարանի աշխատակազմից: