Գեղարքունիքի մարզի առողջապահական հիմնարկներում 2024 թվականի ընթացքում ներդրվել է վեց նոր ծառայություն
3 րոպեի ընթերցում
ԳԱՎԱՌ, 24 ԴԵԿՏԵՄԲԵՐԻ, ԱՐՄԵՆՊՐԵՍ։ Գեղարքունիքի մարզի առողջապահական բյուջեն նախորդ տարվա համեմատ 200 միլիոն դրամով ավելի է կատարվել։
Ինչպես «Արմենպրես»-ին տեղեկացրեց Գեղարքունիքի մարզպետի աշխատակազմի առողջապահության և սոցիալական հարցերի վարչության պետ Լուսինե Վարդանյանը, 2024 թվականի հաշվետու ժամանակաշրջանում մարզի առողջապահական հիմնարկների բյուջեի կատարողականը կազմել է 4 միլիարդ 951 միլիոն դրամ, որը 2023 թվականի համեմատ ավելի է կատարվել շուրջ 200 միլիոն դրամով։
Աճի ցուցանիշները հաջողվել է ապահովել առողջապահական հաստատություններում իրականացված տեխնիկական վերազինումների ու բժշկական նոր ծառայությունների ներդրման շնորհիվ։ Մարզի առողջապահական հիմնարկներում այս տարվա ընթացքում ներդրվել է վեց նոր ծառայություն։ Շահագործման է հանձնվել նոր կառուցված և սարքավորումներով ու գույքով վերազինված Մարտունիի բժշկական կենտրոնի նոր շենքը։ Ընթացքի մեջ է Լճափի ԱԱՊԿ նոր շենքի կառուցումը, որը նախատեսված է շահագործման հանձնել 2025 թվականին։ Առաջիկայում կմեկնարկեն նաև Դպրաբակի և Ծակքարի բուժամբուլատորիաների նոր շենքերի կառուցման աշխատանքները։ Ֆրանսիայի Իզերի դեպարտամենտի և Գեղարքունիքի մարզպետի աշխատակազմի համագործակցության արդյունքում կապիտալ վերանորոգվել և վերազինվել է Ծովինարի բուժամբուլատորիան։ Նույն համագործակցության ծրագրերի շրջանակներում ֆրանսիական կողմի միջոցներով 2025 թվականին կհիմնանորոգվեն և կվերազինվեն Վերին Գետաշենի բուժամբուլատորիայի և Արծվանիստի ԱԱՊԿ շենքերը։ Մարտունիի ծննդատանը վերանորոգվել և կահավորվել է ներարգանդային սերմնավորման ծառայություն մատուցող կաբինետը, որը կգործի 2025 թվականի փետրվարից։
ՄԱԿ-ի հետ համագործակցության շրջանակներում Սոթքում տեղադրվել է մոդուլային ԲՄԿ, իսկ ԿԽՄԿ-ի հետ համագործակցության արդյունքում կառուցվում և մինչև տարեվերջ նախատեսված է ավարտել Շատվանի ԲՄԿ-ի նոր տիպային շենքը։ Գեղարքունիքի մարզպետի աշխատակազմի և տարբեր միջազգային կազմակերպությունների համագործակցության արդյունքում ջրատաքացուցիչներ և արևային ֆոտովոլտային կայաներ են տեղադրվել և առաջիկայում կտեղադրվեն մարզի առողջապահական հիմնարկներում։ 2024 թվականի սեպտեմբերից շարժական մամոգրաֆը մեկ տարի ժամկետով գտնվում է Գեղարքունիքի մարզում։ Հետազոտությունը և դրանից բխող բուժումներ ու այլ հետազոտություններ իրականացվում են պետպատվերի շրջանակներում։