2024 թվականին Գեղարքունիքում գործել է 55 մանկապարտեզ և 9 այլընտրանքային նախադպրոցական հաստատություն
2 րոպեի ընթերցում
ԳԱՎԱՌ, 24 ԴԵԿՏԵՄԲԵՐԻ, ԱՐՄԵՆՊՐԵՍ։ Գեղարքունիքի մարզում 2024 թվականին գործել է 55 մանկապարտեզ և 9 այլընտրանքային ծառայության ծրագրով աշխատող նախադպրոցական հաստատություն, որտեղ 165 խումբ է հաճախել 4069 սան։
Ինչպես «Արմենպրես»-ին տեղեկացրեց Գեղարքունիքի մարզպետի աշխատակազմի ԿՄՍ վարչության պետ Կարեն Զազյանը, 2024 թվականին Զոլաքար և Ծովինար բնակավայրերում բացվել և գործում են արդի չափորոշիչներին համապատասխան մանկապարտեզներ։ 165 խմբին ավելացել է ևս 7 խումբ՝ 193 սանով:
Մարզի11 նախադպրոցական ուսումնական հաստատությունում այս տարվա ընթացքում իրականացվել է կառուցման, հիմնանորոգման և գույքով ապահովման գործընթաց: Ներկայումս ընթացքի մեջ է Վարդենիկի և Ծովասարի մանկապարտեզների համար գույքի մատակարարումը: 2025 թվականին գույքով կհամալրվեն Բերդկունքի, Վարդենիսի Բանավան թաղամասի, Գեղամասար բնակավայրի, Ճամբարակի թիվ 3, Աստղաձորի մանկապարտեզները և կհանձնվեն շահագործման:
«2025-2026 թվականներին համայնքների սուբվենցիոն ծրագրերում ընդգրկվելու են ևս 21 մանկապարտեզի կառուցման, հիմնանորոգման, վերանորոգման և գույքով համալրման աշխատանքներ: Մարզում նախատեսվող 10 կրթահամալիրի կառուցման ավարտից հետո այդ կրթօջախներում ևս կիրականացվի նախադպրոցական կրթություն, որտեղ ընդգրկված կլինեն նաև նախադպրոցական ուսումնական հաստատություն չունեցող հարակից բնակավայրերի երեխաները: Մարզպետի աշխատակազմի ուշադրության կենտրոնում են նաև այն բնակավայրերը, որտեղ բացակայում են կամ չեն բավարարում գործող մանկապարտեզների հզորությունները, այդ պատճառով ՀՀ տարածքային կառավարման և ենթակառուցվածքների նախարարություն է ներկայացվել ևս 11 բնակավայրում նոր մանկապարտեզների կառուցման առաջարկություն»,-ներկայացրեց ԿՄՍ վարչության պետը: