ՆԱՏՕ-ն կոչ է արել հետաքննել Վրաստանում ենթադրյալ ընտրախախտումների մասին հաղորդագրությունները

ԵՐԵՎԱՆ, 28 ՀՈԿՏԵՄԲԵՐԻ, ԱՐՄԵՆՊՐԵՍ: ՆԱՏՕ-ի պաշտոնական ներկայացուցիչ Ֆարահ Դախլալլան կոչ է արել հետաքննել Վրաստանում խորհրդարանական ընտրություններում ենթադրյալ խախտումների մասին հաղորդագրությունները։ «Արմենպրես»-ի փոխանցմամբ՝ այս մասին ՆԱՏՕ-ի պաշտոնյան գրել է X սոցիալական հարթակում:

«Ընտրությունների միջազգային դիտորդական առաքելությունն արձանագրել է անհավասար պայմաններ, որոնցում անցկացվել են Վրաստանի ընտրությունները, ինչը խաթարում է հանրության վստահությունը դրանց արդյունքների նկատմամբ: Ընտրությունների խախտումների հետ կապված հաղորդագրությունները պետք է ամբողջությամբ հետաքննվեն», - գրել է Ֆարահ Դախլալլան։

Ավելի վաղ ԵՄ դիվանագիտության ղեկավար Ժոզեպ Բորելը Եվրահանձնաժողովի հետ համատեղ հայտարարությունում կոչ էր արել հետաքննել Վրաստանում տեղի ունեցած ենթադրյալ ընտրախախտումները։

ԱՄՆ պետքարտուղար Էնթոնի Բլինքենն իր հերթին հայտարարել էր, որ Վրաստանում խորհրդարանական ընտրությունների արդյունքները վստահելի չեն, և կոչ էր արել հետաքննել ընտրախախտումների մասին բոլոր հաղորդումները։  

Իսկ Վրաստանի վարչապետ Իրակլի Կոբախիձեն կառավարության նիստում հայտարարել է, որ իշխող «Վրացական երազանք» կուսակցությունը հոկտեմբերի 26-ին անցկացված խորհրդարանական ընտրություններում ստացել է ընտրողների աննախադեպ աջակցությունը, և իշխանությունները կպաշտպանեն այդ ընտրությունը՝ թույլ չտալով ոտնձգություններ սահմանադրական կարգի դեմ։ 

Վրաստանում խորհրդարանական ընտրությունները տեղի են ունեցել հոկտեմբերի 26-ին։ Կենտրոնական ընտրական հանձնաժողովի տվյալների համաձայն՝ հաղթանակ է տարել իշխող «Վրացական երազանք» կուսակցությունը՝ ստանալով ընտրողների 53,93 %-ի աջակցությունը։ 

Խորհրդարան է անցել չորս ընդդիմադիր կուսակցություն, որոնք, ընդհանուր առմամբ, ստացել են ձայների 37,78%-ը: Ընդդիմությունը հայտարարել է, որ չի ճանաչում ԿԸՀ-ի տվյալները։