2 րոպեի ընթերցում
ԵՐԵՎԱՆ, 25 ՄԱՅԻՍԻ, ԱՐՄԵՆՊՐԵՍ: «Հայաստան» դաշինքի նախընտրական ցուցակը գլխավորող, ՀՀ երկրորդ նախագահ Ռոբերտ Քոչարյանն անդրադարձել է ՀՀ առաջին նախագահ Լևոն Տեր-Պետրոսյանի դիտարկումներին: Լևոն Տեր-Պետրոսյանը նշել էր, որ ստեղծված իրավիճակում պատասխանատվության իր բաժինն ունի նաև ազգի վերնախավը՝ էլիտան, որը «ոչմիթիզականությունը դարձրել էր հայության ազգային դավանանքը»: Լրագրողների հետ հանդիպմանը հարց հնչեց, թե արդյոք Ռոբերտ Քոչարյանն իրեն համարո՞ւմ է «ոչմիթիզականություն» սկզբունքը կրող:
«Ես ցանկություն չունեմ մեկնաբանել ՀՀ առաջին նախագահի հայտարարությունները…Ես 10 տարի եղել եմ ՀՀ նախագահ, և չի եղել որևէ մեկ առաջարկ համանախագահների կողմից, որն ընդուներ Ադրբեջանը և մերժեր Հայաստանը: Այդ տասը տարվա ընթացքում բոլոր այդ առաջարկներին մենք ասում էինք, որ ունենք վերապահումներ, բայց սկզբունքորեն պատրաստ ենք դրանք քննարկել: Ադրբեջանն այդ առաջարկները կտրականապես մերժում էր: Սա լավագույն պատասխանն է առաջին նախագահի նման կարգի եզրակացություններին կամ մեղադրանքներին»,- «Արմենպրես»-ի հաղորդմամբ, ասաց Ռոբերտ Քոչարյանը:
Հարցին, թե արդյոք ղարաբաղյան հարցի լուծման բանալին Ռուսաստանո՞ւմ է, Ռոբերտ Քոչարյանը նշեց, որ չի կարող բանալին մեկ տեղում լինել: Նման դիտարկումն, ըստ նրա, պարզունակ մեկնաբանություն է:
«Չի լինում այդպես: Կան կոնֆլիկտի կողմեր, եռանախագահություն, Ռուսաստան: Ակնհայտ է, որ Ռուսաստանն ունի առանցքային դերակատարում հատկապես վերջին իրադարձությունների կտրվածքով: Ամեն դեպքում, մտածել, որ բանալին մեկ տեղ է դրված, պարզապես չափից դուրս իրականությանը չհամապատասխանող պարզունակություն է»,-հավելեց Ռոբերտ Քոչարյանը: