2 րոպեի ընթերցում
ԵՐԵՎԱՆ, 2 ՀՈԿՏԵՄԲԵՐԻ, ԱՐՄԵՆՊՐԵՍ: WCIT 2019-ի հովանավոր «Google»-ը Երևանում անցկացվող տեղեկատվական տեխնոլոգիաների 23-րդ համաշխարհային համաժողովի 15 տոմս կնվիրի հայաստանցի ուսանողներին: Առաջատար տեխնոլոգիաների ձեռնարկությունների միությունը (ԱՏՁՄ) կրկնապատկում է այդ թիվը: «Արմենպրես»-ի հաղորդմամբ՝ այս մասին Կ. Դեմիրճյանի անվան մարզահամերգային համալիրում միջոցառման անցկացման վայրի նախապատրաստական աշխատանքներին հետևելիս լրագրողների հետ զրույցում հայտնեց միության նախագահ, «WCIT 2019» կազմակերպչական կոմիտեի նախագահ Ալեքսանդր Եսայանը:
«ԱՏՁՄ-ն կարևորում է կրթությունն ու ՏՀՏ ոլորտի համար պրոֆեսիոնալ կադրերի պատրաստումը: Ավելի վաղ WCIT 2019-ի կազմակերպչական կոմիտեն մասնակցության 100 անվճար տոմս է շնորհել Հայաստանի համալսարանների լավագույն ուսանողներին, որոնց ներկայացրել են ՏՏ, ճարտարագիտություն և բնական գիտություններ դասավանդող համալսարանները»,-նշեց Ալեքսանդր Եսայանը:
30 անվճար տոմսերը կտրամադրվեն առաջին դիմողներին: Հոկտեմբերի 3-ին՝ ժամը 09:00-ին, WCIT 2019-ի՝ «Ֆեյսբուք»-ի էջում կհայտարարվի մրցույթի հայտը, որն անհրաժեշտ է լրացնել՝ նշելով անուն, ազգանուն, այլ տվյալներ, կցել անձնագրի և ուսանողի կարգավիճակը հաստատող փաստաթղթի պատճենները:
Դասախոսների, ուսանողների, ակադեմիական ոլորտի ներկայացուցիչների համար նույնպես մասնակցության բացառիկ հնարավորություն է սահմանվել:
WCIT 2019-ը Երևանում կանցկացվի հոկտեմբերի 6-9-ը: Հոկտեմբերի 6-ին Հանրապետության հրապարակում համաժողովի շրջանակում տեղի կունենա աննախադեպ համերգ: Իսկ հոկտեմբերի 7-ին արդեն մարզահամերգային համալիրում կկայանա համաժողովի բացումը: