Սուրեն Պապիկյանը վստահեցնում է, որ ոչ պրոֆեսիոնալ պաշտոնյաները չեն շարունակի պաշտոնավարել
2 րոպեի ընթերցում
ԵՐԵՎԱՆ, 10 ՀՈԿՏԵՄԲԵՐԻ, ԱՐՄԵՆՊՐԵՍ: ՀՀ տարածքային կառավարման և զարգացման նախարար Սուրեն Պապիկյանը վստահեցնում է, որ ոչ պրոֆեսիոնալ պաշտոնյաները չեն շարունակի պաշտոնավարել: Կառավարության նիստից հետո լրագրողների հետ զրույցում Պապիկյանն այս մասին նշեց՝ անդրադառնալով ոչ պրոֆեսիոնալ կադրերի պաշտոնավարման հարցին։ «Պաշտոնյային, առավել ևս քաղծառայողին հենց այնպես չեն հեռացնում աշխատանքից, կա ընթացակարգ, եթե լինում է երկրորդ նկատողությունը, ապա անձը հեռացվում է աշխատանքից»,- «Արմենպրես»-ի փոխանցմամբ, նշեց նա։
Հարցին, թե ի՞նչ հետեւություններ են արվել Արարատի մարզպետի թույլ տված սխալից 40 հեկտարի հետ կապված կամ Շիրակի մարզպետի հետ կապված միջադեպի առնչությամբ, նախարարն ասաց, որ վերջինիս մասով տեղեկությունը չի հաստատվել, հերքվել է։ «Շիրակի մարզպետը նշել է, որ այդ մասով դիմելու է պատկան մարմիններին, հերքում է պահանջել տվյալ լրատվամիջոցից։ Արարատի մարզպետի պարագայում էլ թվերի խնդիր է եղել, կարծում եմ՝ դա լուծելի խնդիր է, և յուրաքանչյուրս էլ կարող ենք շփոթվել»,- ասաց նա։
Վերջին շրջանում քննարկման առարկա էր դարձել Արարատի մարզ ՀՀ վարչապետ Նիկոլ Փաշինյանի այցի ժամանակ մարզպետի կողմից արված արտահայտությունը, թե Արարատի մարզում 40 հազար հեկտար կաթիլային ոռոգման այգի կա, որը նրա պնդմամբ շփոթմունք է եղել։
Ավելի վաղ էլ թերթերից մեկը գրել էր, թե Շիրակի մարզպետ Կարեն Սարուխանյանը ԵՄ պատվիրակության ղեկավար Պյոտր Սվիտալսկիին համարել էր ՀՀ–ում ՌԴ դեսպանը: